आज आइतबार काठमाडौँ उपत्यकामा सार्वजनिक बिदा रहेको छ । सरकारले साउन २० गते आइतबारका लागि उपत्यकाका ३ जिल्लामा सार्वजनिक दिने निर्णय गरेको हो ।
आइतबार मत्स्येन्द्रनाथको भोटो देखाउने दिन परेकाले सार्वजनिक बिदा दिने निर्णय गरिएको गृह मन्त्रालयले जनाएको छ ।
वर्षा र सहकालका देवताका रूपमा पुजिने रातो मत्स्येन्द्रनाथको रथलाई लगनखेलको ठटी टोलबाट तानेर जावलाखेल पुर्याइएको छ । वैशाख शुक्ल प्रतिपदादेखि रथारोहण सुरु भएर शुभ साइतअनुसार लगनखेलको ठटी टोलमा रोकिएको रथलाई बिहिबार जावलाखेल पुर्याइएको हो ।
रातो मत्स्येन्द्रनाथका पूजारी शाहु शाक्यका अनुसार रातो मत्स्येन्द्रनाथको रथलाई जावलाखेल पुर्याएको चार दिनमा भोटो देखाइन्छ ।
जावलाखेलको ललितमण्डपमा रातो मत्स्येन्द्रनाथको रथ पुर्याएको चार दिनमा हरेक वर्ष राष्ट्रप्रमुखको हातबाट भोटो देखाउने प्रचलन भएकाले साउन २० गते आइतबार आज राष्ट्र प्रमुखबाट भोटो देखाइने छ ।
हरेक वर्षको वैशाख शुक्ल प्रतिपदादेखि सुरु हुने रातो मत्स्येन्द्रनाथको रथजात्रा काठमाडौँ उपत्यकाको पूरानो र सबैभन्दा लामो जात्राका रूपमा चिनिन्छ । जावलाखेल पुर्याएको चार दिनपछि राष्ट्रप्रमुखबाट भोटो देखाएपछि यो वर्षको जात्रा समापन हुन्छ ।
