भारतको तामिलनाडु विधानसभा निर्वाचन २०२६ मा अभिनेताबाट राजनीतिज्ञ बनेका जोसेफ विजयको तमिलागा वेत्त्री कजगम (टीभीके) ले ठूलो उलटफेर गर्दै १०८ सिट जितेको छ। यो २३४ सदस्यीय सदनमा बहुमत (११८) बाट मात्र १० सिट कम हो।
टीभीके एकल ठूलो दल बनेको छ भने डीएमके र एआईएडीएमकेको लामो समयदेखिको दुईध्रुवीय राजनीतिलाई तोडिदिएको छ। विजय (जसलाई उनका फ्यानहरूले थालापती भनेर बोलाउँछन्) ले गभर्नरलाई सरकार गठनको दाबी पेश गरेका छन्।
स्रोतहरूका अनुसार उनको सपथ ग्रहण समारोह ७ मे २०२६ मा चेन्नईको जवाहरलाल नेहरू इनडोर स्टेडियममा हुने सम्भावना छ। दलले दुई हप्ताभित्र सदनमा बहुमत प्रमाणित गर्ने बताएको छ।
टीभीकेले आफैं सरकार बनाउने दाबी गरे पनि बहुमत नपुगेकोले साना दलहरूको बाह्य समर्थन खोजिरहेको छ। मुख्य सम्भावित समर्थकहरू कांग्रेस , विद्युतलै चिरुथैगल कच्ची (भीसीके) , कम्युनिस्ट पार्टी (सीपीआई र सीपीआईएम) जस्ता पुराना डीएमके सहयोगीहरू रहेका छन् ।
एआईएडीएमकेसँग गठबन्धन गरे ठूलो बहुमत पुग्ने भए पनि त्यो जटिल मानिन्छ। टीभीकेले “बिना समर्थन” सरकार बनाउने आत्मविश्वास देखाएको छ।
अभिनेताबाट राजनीतिज्ञ
विजय दक्षिण भारतीय सिनेमाका सुपरस्टार हुन्। सन् २०२४ फेब्रुअरी २ मा उनले टीभीके पार्टी गठन गरे र सिनेमाबाट पूर्ण रूपमा अलग भएर राजनीतिमा लागे। उनको फ्यानबेस (थालापती आर्मी) लाई डिजिटल अभियान र सामाजिक सञ्जालमार्फत प्रभावकारी रूपमा प्रयोग गरियो। यो उनको पहिलो निर्वाचन हो, जसमा उनले पेराम्बुर र तिरुची ईस्ट दुवैबाट जित हासिल गरेका छन्। तामिलनाडुमा एमजीआर, जयललिता जस्ता कलाकार राजनीतिमा सफल भएका थिए — विजयले त्यही परम्परालाई निरन्तरता दिएका छन्।
उनको मुख्य एजेण्डामा जनकल्याण र विकास, भ्रष्टाचार नियन्त्रण, युवा रोजगारी, शिक्षा र स्वास्थ्य सुधार रहेका छन्। त्यस्तै ड्राविडियन संस्कृति र तामिल भाषाको संरक्षण हुने गरि तामिल पहिचान पनि रहेको छ । उनले सबै वर्ग र क्षेत्रलाई समेट्ने “रेनबो कोएलिसन” मोडल अघि सारेका छन्। उनले डीएमकेको लामो शासनमा जनता निराश भएको भन्दै परिवर्तनको नारा दिएका थिए।
यस संगै तामिलनाडुको राजनीतिमा नयाँ युग सुरु भएको छ। थालापती विजय अब मुख्यमंत्री विजय बन्न लागेका छन् — यो सिनेमाटिक कथा वास्तविकतामा परिणत हुँदैछ।
