नेपाल उद्योग वाणिज्य महासंघको एसोसियट तर्फको उपाध्यक्षमा उद्योगी प्रबलजंग पाण्डे निर्वाचित भएका छन् । बहालवाला उपाध्यक्ष ज्योत्सना श्रेष्ठलाई ३२९ मतले हराउँदै पाण्डे निर्वाचित भएका हुन्।
निर्वाचनको अन्तिम मतपरिणाम अनुसार पाण्डेले १०७९ मत ल्याएर निर्वाचित हुँदा श्रेष्ठले ७५० मत मात्रै प्राप्त गरिन् ।
मंगलबार भएको निर्वाचनमा एसोसियट तर्फको उपाध्यक्षका लागि कुल १ हजार ८३४ मत खसेको थियो । कुल खसेको मतका आधारमा निर्वाचित भएका पाण्डेले ५८.८३ प्रतिशत मत पाएका छन् ।
३ कार्यकाल महासंघको केन्द्रीय कार्यकारिणी समिति सदस्य भइसकेका उनी लोमस ग्रुपका सञ्चालक हुन् । औषधी, सिमेन्ट, बैंक तथा वित्तीय संस्था र बीमा कम्पनीमा उनी लगानीकर्ताका रुपमा आवद्ध छन् । उनी अहिले सिटिजन्स बैंकको अध्यक्ष छन् ।
पाण्डे महासंघका पूर्व अध्यक्ष प्रदीपजंगका छोरा हुन् । करिब १ दशकदेखि महासंघको आन्तरिक समिकरणमा सक्रिय रहेका उनी काबिल र व्यवस्थापकीय जिम्मेवारी कुशलतापूर्वक पूरा गर्ने व्यक्तित्वका रुपमा चिनिन्छन् ।
