जिल्ला अदालत काठमाडौँले व्यवसायी शेखर गोल्छालाई अनुसन्धानका लागि हिरासतमा राख्न अनुमति नहुने आदेश गरेको छ । न्यायाधीश मोना सिंहको इजलासले आज गोल्छालाई हिरासतमा राखी अनुसन्धान गर्न म्याद थप गर्न नमिल्ने आदेश गरेको हो ।
आदेशमा भनिएको छ, “प्रतिवादी शेखर गोल्छालाई हिरासतमै राखी मुद्दाको अनुसन्धान गर्नुपर्नेसम्मको अवस्थाको विद्यमानता रहेको नदेखिएकाले मुलुकी फौजदारी कार्यविधि संहिता, २०७४ को दफा १४(३) बमोजिम प्रतिवादीलाई हिरासतमा राखी अनुसन्धान गर्न म्याद थप गर्न मिलेन ।”
व्यवसायी गोल्छालाई धितोपत्र र बिमासम्बन्धी कसुरमा अनुसन्धानका लागि प्रहरीले यही वैशाख १४ गते पक्राउ गरेको थियो । सर्वोच्च अदालतले हिजो उनलाई धितोपत्र समबन्धी कसुरमा थुनामा राख्नु आवश्यक नरहेको भन्दै थुनामुक्त गर्न आदेश दिएको थियो । सर्वोच्चको आदेशले थुनामुक्त भएलगतै उनी बीमा सम्बन्धी कसुरमा पक्राउ परेका थिए। उनलाई म्याद थपको लागि लागिएकोले जिल्ला अदालतले म्याद थप नहुने आदेश दिएको हो । अदालतको आदेशसँगै व्यवसायी गोल्छा थुनामुक्त हुनु हुनेछ ।
