नेपाल आयल निगमले सेवाग्राहीहरुलाई इन्धनको बचत गर्न अनुरोध गरेको छ । निगमका कार्यकारी निर्देशन डा. चण्डिका भट्टले एक भिडियो सन्देश जारी गरेर इन्धनको बचत गर्न उपभोक्ताहरुलाई अनुरोध गरेका हुन् ।
उनले एक जना मोटरसाइकलले दैनिक १ लिटर पेट्रोल बचाउन सके एक दिनमा राज्यको २२ करोड बचत हुने र पेट्रोल डिजेल प्रयोग गर्ने १ गाडिले हरेक दिन १ लिटर बचत गरेमा करिब ४ करोड बचत हुने जनाएका छन् । यसरी प्रयोगकर्ताले एक दिनमा एक लिटर इन्धनको बचत गर्दा राज्यको दैनिक २६ करोड रुपैयाँ बचत हुने उनको भनाइ छ ।
कार्यकारी निर्देशक सरकारबाट कर छुट पाउँदा पनि किन मूल्य बढ्यो भन्ने प्रश्नको समेत जवाफ दिएका छन् । उनले अन्तर्राष्ट्रिय बजारमा कच्चा तेलको मूल्यमा आएको उछाल र भारतीय आयल कर्पोरेसनबाट प्राप्त हुने नयाँ खरिद दरमा भएको बढोत्तरीका कारण मूल्य समायोजन गर्नैपर्ने बाध्यता रहेको स्पष्ट पारेका छन् । उनका अनुसार सरकारले कर छुट नदिएको भए मूल्य अझै माथि जान्थ्यो ।
‘सरकारले केही शीर्षकमा कर सहुलियत दिएकै कारण मूल्य अझै धेरै माथि जान नपाएको हो’ कार्यकारी निर्देशक भट्टले भने ‘सरकारले करमा लचकता नदेखाएको भए र निगमले लागत अनुसारकै मूल्य तोकेको भए इन्धनको भाउ अहिलेको तुलनामा निकै महँगो हुने थियो ।’
आयल निगम अहिले पनि ठुलो सञ्चित नोक्सानीमा रहेको र पेट्रोलियम पदार्थको नियमित आपूर्ति सुनिश्चित गर्नका लागि वित्तीय सन्तुलन कायम राख्नु अतिआवश्यक रहेको उनको भनाइ छ ।
