‘भ्लग’का नाममा महिला यात्रुहरुमाथि अपशब्द बोल्दै भिडियो बनाएर सामाजिक सञ्जालमा राख्ने व्यक्ति पक्राउ पर्न थालेका छन् । बिजनेश पाना डटकमले गत पौषमा राइड सेयरिङका चालक तथा राइडरहरु महिला यात्रुलाई सेवा दिने क्रममा भ्लगका नाममा अपशब्द बोलेर भिडियो बनाउने र त्यस्ता भिडियोहरु सामाजिक सञ्जालमा राख्ने गरेको बारे समाचार प्रकाशित गरेको थियो ।
त्यतिबेला हामीले प्रहरीको साइबर ब्यूरोमा समेत यसबारे कुरा गरेका थियौँ । अहिले भने प्रहरीले महिला यात्रुहरुलाई अपशब्द प्रयोग गरेर भिडियो बनाउने र सामाजिक सञ्जालमा राख्नेहरुलाई पक्राउ गर्न थालेको हो । यसक्रममा नक्सालबाट एक जना युवकलाई प्रहरीले पक्राउ गरेको छ । ति युवकलाई काठमाडौँ उपत्यका अपराध अनुसन्धान कार्यालयले पक्राउ गरेको हो ।
प्रहरीले युवकको परिचय गोप्य राखेको छ भने पीडित पक्षलाई नजिकैको प्रहरी कार्यालयमा गएर उजुरी दिन आग्रह गरेको छ ।
यसअघिः
राइड सेयरिङको अध्यारो पाटो: ‘भ्लग’का नाममा महिला यात्रुको मानमर्दन, भिडियो छरपस्ट
पठाओ, इन्ड्राइभ, याङ्गो जस्ता राइड सेयरिङ सेवा प्रदायकका राइडर वा चालकहरुले ‘भ्लग’का नाममा महिला प्रयोगकर्ताहरुको मानमर्दन हुने गरी भिडियो बनाएर सामाजिक सञ्जालमा राख्ने क्रम बढ्दो थियो । खासगरी, रात्रीकालिन व्यवसाय (दोहारी साँझ, डान्स बार वा क्लबहरु)मा काम गर्ने व्यक्तिहरु काम सकेर घर फर्किँदा अवेर हुने र काम सकेर राइड सेयरिङ सेवा लिएर निवासमा फर्किँदा महिला तथा युवतीहरु राइडरहरुको ‘भ्लग’को शिकार हुने क्रम बढ्न थालेको छ ।
रात्रीकालिन व्यवसायमा काम गर्ने महिला तथा युवतीहरु तथा मदिरा पिएका महिलाहरुसँग ‘कामुक’ गफ गर्ने र उक्त कुराकानीलाई रेकर्ड गरेर युट्युब तथा फेसबुकमा अपलोड गर्ने क्रम पछिल्लो समय बढिरहको छ । सामाजिक सञ्जालहरुमा पनि यस्ता भिडियोहरु छरपस्ट देख्न सकिन्छ ।
