उच्च अदालतले नेपाल उद्योग वाणिज्य महासंघको साधारणसभा रोक्न आदेश दिएपछि अहिले तारन्तार बैठक चलिरहेको छ । बिहिबार बेलुका उच्च अदालत पाटनका न्यायाधीश द्वय पाटनका न्यायाधीश खड्कबहादुर केसी र दीपक खनालको इजलासले महासंघको नाममा अन्तरिम आदेश जारी गर्दै वार्षिक साधारणसभा सहितको चुनाव रोक्न आदेश दिएपछि बैठकका श्रृङ्खला सुरु भएका छन् ।
बिहिबार साँझ नै अनौपचारिक छलफल भएको थियो । बिहिकार महासंघको सचिवालयभन्दा बाहिर उपस्थित पदाधिकारीबीच यसबारे सामान्य छलफल भएको थियो । शुक्रबार यसैबारेमा छलफल गर्न दिउँसो २ बजेपछि सल्लाहकार सहितको बैठक बोलाइएको छ ।
३ बजे महासंघको पदाधिकारी बैठक बोलाइएको छ । उपाध्यक्ष ज्योत्सना श्रेष्ठका अनुसार पदाधिकारी बैठकमा अदालतको आदेशबारे प्रष्ट छलफल हुनेछ भने आवश्यक निर्णय पनि आजकै बैठकले लिने सम्भावना छ ।
यसैगरी, शनिबार महासंघको वर्तमान केन्द्रीय कार्यकारिणी समितिको अन्तिम बैठक बस्ने तालिका थियो । अब त्यो बैठक बस्ने कि नबस्ने भन्नेमा अन्योल छ । आज बस्ने पदाधिकारी बैठकले सके आजै बेलुकासम्म र नभए भोली भएपनि केन्द्रीय समितिको बैठक राखेर अदालतको आदेश अनुसार ‘फास्ट ट्रयाक’बाट काम सकेर निर्धारित मितिमै साधारणसभा र चुनाव गराउन पहल गर्ने बताइएको छ ।
अर्का एक पदाधिकारीले पनि आजको बैठकले ठोस निष्कर्ष निकाल्ने बताए । ‘चुनाव सार्नु हुँदैन भन्नेमा एकमत नै छ, अब अदालतले पनि पहिलाको आदेश अनुसारको प्रक्रिया पूरा गरेर साधारणसभा गर्नू भनेको हुनाले आजको बैठकले उच्च अदालत पाटनको यसअघिको आदेश अनुसारको प्रक्रिया पूरा गर्न सक्छ’ ति पदाधिकारीले भने ।
महासंघको साधारणसभा चैत २९ र ३० गतेका लागि तोकिएको भएपनि नेपाल पेट्रोलियम ढुवानी व्यवसायी महासंघले साधारणसभा स्थगितको माग गर्दै मुद्दा दायर गरेको थियो । उक्त मुद्दामा सुनुवाई गर्दै उच्च अदालत पाटनले बिहिबार अन्तरिम आदेश दिएको हो ।
