पर्यटन व्यवसायी कर्ण शाक्यको पोखरास्थित वाटरफ्रन्ट होटलमा महानगरले डोजर चलाएपछि शाक्यले प्रतिक्रिया दिएका छन् । होटलको संरचनाले फेवाताल अतिक्रमण गरेको आरोप भन्दै विगतदेखि नै आरोप लागिरहेको अवस्थामा शनिबार महानगरले डोजर चलाएपछि शाक्यले सामाजिक सञ्जालमार्फत गुनासो पोखेका छन् ।
उनले लेखेका छन्, ‘पोखराको वाटरफ्रन्ट होटल केवल व्यवसाय होइन, यो हाम्रो विश्वास, सङ्घर्ष र आस्थाको प्रतीक हो ।’ उनका अनुसार २० वर्षअघि माओवादी आन्दोलनको समयमा दिवाकर राजकर्णिकारसँग मिलेर उनले पर्यटन व्यवसायमा हात हालेका थिए । सोही क्रममा फेवाताल नजिकै रहेको १७ रोपनी जग्गा (बुद्ध लजसहित) स्थानीय पोखरेली उद्यमीबाट खरिद गरी अन्तर्राष्ट्रिय स्तरको होटल निर्माण गरिएको थियो ।
तर पर्यटक सिजनमै बिना सूचना पर्खाल भत्काइएको भन्दै उनले चित्त दुखाएका छन् । ‘हाम्रो मनमा गहिरो पीडा र चिन्ता जाग्यो । यति सबेरै पहिलो निशानामा हाम्रो होटल किन ? के हामी खराब उद्यमी हौँ र ?’ उनले प्रश्न गरेका छन् ।
६५ मिटरको मापदण्ड कुनै निजी मुद्दा नभएर राष्ट्रिय सरोकारको विषय रहेको भन्दै उनले आफ्नो होटलले सरकारका कुनैपनि नियम उल्लङ्घन नगरेको दाबी गरेका छन् ।
‘लालपुर्जा, नक्सा पास, पर्यटन विभागको लाइसेन्स, उद्योग विभागको प्रमाणपत्र, राष्ट्र बैङ्कको इजाजत पत्र सबै छन् । हरेक वर्ष कर तिरिएको छ र कुनै बैङ्कको ऋणसमेत छैन’ उनले भनेका छन्, ‘ हामी खराब उद्यमी होइनौँ, जिम्मेवार र सचेत नागरिक हौँ ।’
होटलको भवन मापदण्डअनुसार ६५ मिटर टाढा रहेको र तीन तल्लाको मात्र भएको शाक्यले बताएका छन् । उनले लेकसाइड क्षेत्रमा हजारौँ बस्ती, उद्योग, व्यापार, होटल र रेस्टुरेन्टहरू यस्तै जग्गामा रहेको र त्यस्ता संरचनाहरू उचित मुआब्जा दिएर विधिवत् अधिग्रहण नगरी भत्काउन नमिल्ने बताएका छन् ।
