भारत र पाकिस्तानबीच बढ्दो सैन्य तनावका कारण इन्डियन प्रिमियर लिग (आईपीएल) २०२५ अनिश्चितकालको स्थगित भएको छ । हिन्दुस्थान टाइम्सले प्रतियोगिताको बाँकि सबै खेलहरु अनिश्चितकालको लागि स्थगित भएको जनाएको छ ।
भारतीय क्रिकेट बोर्डको आज बिहान बसेको बैठकले प्रतियोगिता स्थगित गर्ने निर्णय गरेको हो । प्रतियोगितामा हालसम्म ५८ खेल भएको छ भने समूह चरण १२ खेल र त्यसपछिका प्ले अफ र फाइनल खेल हुन बाँकि थियो।
बिहीबार साँझ हिमाचल प्रदेशको धर्मशाला क्रिकेट स्टेडियममा पञ्जाब किंग्स र दिल्ली क्यापिटल्सबीचको खेल पनि बीचमै रोकिएको थियो। पाकिस्तानले जम्मू, पञ्जाब र राजस्थानका क्षेत्रहरूमा ड्रोन र मिसाइल आक्रमण गरेको खबर आएपछि खेल बीच मै रद्द गरिएको थियो ।
धर्मशालाको हिमाचल प्रदेश क्रिकेट एसोसिएसन (एचपीसीए) स्टेडियममा खेलको १०.१ ओभरमा पञ्जाब १२२/१ को स्थितिमा थियो, जब स्टेडियमका फ्लडलाइटहरू बन्द भएका थिए। सुरुमा यो प्राविधिक गडबडी मानिएको थियो, तर पछि जम्मू र पठानकोटमा हवाई आक्रमणको चेतावनीका कारण यो सुरक्षा उपाय भएको पुष्टि भएको थियो।
यस अघि मे ११ मा धर्मशालामामा हुने भनियेको पञ्जाब किंग्स र मुम्बई इन्डियन्सबीचको खेल अहमदाबादमा सारिएको थियो। धेरै विदेशी खेलाडीहरूले सुरक्षा चिन्ताका कारण भारत छोड्ने इच्छा व्यक्त गरेका थिए।
देश युद्दमा रहेको बेला प्रतियोगिता जारी राख्नु उचित नहुने तथा खेलाडी , अफिसियल र प्रतियोगितामा आवद्द सबैको सुरक्षा पहिलो प्राथमिकता भएको भन्दै भारतीय क्रिकेट बोर्डले प्रतियोगिता स्थगित गर्ने निर्णय गरेको बताईएको छ ।
पाकिस्तानमा चलिरहेको पाकिस्तान सुपर लिग (पीएसएल) पनि प्रभावित भएको छ। मे ८ मा पेशावर जाल्मी र कराची किंग्सबीचको खेल स्थगित गरिएको छ, र पाकिस्तान क्रिकेट बोर्ड (पीसीबी) ले बाँकी खेलहरू युएईमा गर्ने भएको छ ।
भारतले जम्मू, धर्मशाला, अमृतसर, चण्डीगढ, श्रीनगर, लेह, पठानकोट, जयपुर, जोधपुर, बीकानेर, भटिण्डा, जैसलमेर, लुधियाना, किशनगढ, शिमला, भुज, जामनगर, र अन्य सहित २७ विमानस्थलहरू मे १०, २०२५ सम्म बन्द गरेको छ। यसले उड्डयन र क्रिकेट दुवैमा ठूलो प्रभाव पारेको छ।
