फागुन २१ गते चुनाव गराउने म्यान्डेटसहित बनेको सुशिला कार्की नेतृत्वको अन्तरिम सरकारबाट ४ जना मन्त्रीहरु राजीनामा दिएर चुनाव लड्न हिडेका थिए । कुलमान घिसिङ ऊर्जा मन्त्रीबाट राजीनामा दिएर चुनाव लड्न जाँदा जगदीश खरेल सञ्चार, महावीर पुन शिक्षा र बब्लु गुप्ता खेलकुद मन्त्रालय छोडेर चुनाव लडेका थिए ।
यी ४ मध्ये कुलमान घिसिङ आफ्नै अगुवाईमा दर्ता भएको उज्यालो नेपाल पार्टीबाट चुनाव लडेका थिए भने खरेल र गुप्ता राष्ट्रिय स्वतन्त्र पार्टी (रास्वपा)बाट उम्मेदवार बनेका थिए । पुनले भने स्वतन्त्र उम्मेदवारी दिएका थिए ।
३ जनाले चुनाव जित्दा कुलमान पराजित
अन्तरिम सरकारबाट बाहिरिएर चुनाव लड्न गएकामध्ये ३ जनाले जनताबाट अनुमोदित भएका छन् । जगदीश खरेल ललितपूर २ बाट निर्वाचित भएका छन् । उनले ३९ हजार ४९१ मत ल्याउँदा प्रतिस्पर्धी नेपाली कांग्रेसका उम्मेदवार प्रेम कृष्ण महर्जनले जम्मा ७ हजार ४२० मत मात्रै पाए ।
यस्तै, बब्लु गुप्ता सिरहा १ बाट निर्वाचित भएका छन् । उनले ४१ हजार ३२२ मत पाउँदा कांग्रेसका रामसुन्दर चौधरी ९ हजार ७८४ मतमा समेटिए ।
शिक्षा मन्त्रीबाट राजीनामा दिएर चुनाव लड्न म्याग्दी पुगेका महावीर पुन पनि निर्वाचित भएका छन् । उनले कुनै दलबाट नभई स्वतन्त्र उम्मेदवारी दिएका थिए । उनले २२ हजार ८५० मत ल्याएर चुनाव जित्दा एमालेका हरिकृष्ण श्रेष्ठ ७ हजार ९१९ मतमा रोकिए ।
तर, सँगै सरकारबाट बाहिरिएका कुलमान घिसिङ भने पराजित भएका छन् । उनले काठमाडौँ ३ मा उज्यालो नेपाल पार्टीबाट उम्मेदवारी दिएका थिए तर, रास्वपाका राजुनाथ पाण्डेसँग पराजित भए । पाण्डेले १८ हजार ७५७ मत पाएर चुनाव जित्दा घिसिङले भने ११ हजार १७१ मत मात्रै पाएका थिए ।
