विराटनगरस्थित एसियन बिस्कुट इन्डस्ट्रिजले नेपालमा कोदोको पीठोबाट बिस्कुट उत्पादन सुरु गरेको छ । कम्पनीले कोदोको पीठोबाट बिस्कुट बनाएर त्यसको बजारीकरण सुरु गरेको हो ।
एसियन फुड्सका अनुसार नेपालमा कार्पोरेट हाउसका तर्फबाट कोदोको पीठोको बिस्कुट उत्पादन गरिएको यो पहिलो पटक हो । कम्पनीले आन्तरिक बजारमा मात्रै नभई निर्यातसमेत गर्ने लक्ष्य लिएको र सकेसम्म दशैँ अगाडी नै भारतीय बजारमा कोदोको बिस्कोटको निकासी सुरु गरिने एसियन फूड्सका सञ्चालक महेश जाजूले बिजनेश पानासँगको कुराकानीमा बताएका छन् ।
नेपाली कच्चा पदार्थको उपयोग र प्रवद्र्धन गर्दै मानव स्वास्थ्यलाई समेत ख्यालमा राखेर कोदोको पीठोबाट बिस्कुटको उत्पादन सुरु गरेको बताएको छ । उद्योगका सञ्चालक आशिष जाजूका अनुसार बिस्कुटको मुख्य कच्चा पदार्थ कोदो नेपालकै पहाडी जिल्लाबाट ल्याइन्छ ।
बिस्कुटमा इलामको अलैँचीको धुलो पनि मिसाइएको छ । दालचिनीको धुलो पनि हालिएको छ । कोदो र दालचिनी मधुमेह रोगको रोगथामका लागि लाभदायक उत्पादन हुन् ।
उद्योगले ५० ग्रामको बिस्कुटको खुद्रा बिक्री मूल्य २५ रुपैयाँ तोकेको छ । प्याकेटमै कोदोको बिस्कुट लेखिएको छ ।
कम्पनीले भारतमा निर्यात गर्न पनि तयारी अघि बढाएको छ । भारतमा पठाउने उत्पादनमा भने कोदो लेखिने छैन, भारतमा जाने प्याकेटमा मिलेट र रागी लेखिएको हुनेछ । उद्योगले भारतीय बजारमा दशैँ तिहार अगावै निकासी गरिसक्ने लक्ष्य राखेको छ ।
एसियनले विभिन्न ३० प्रकारका विस्कुट उत्पादन तथा निर्यात गर्दै आएको छ । यो उद्योगले आफ्ना उत्पादन मुख्यगरी भारतीय बजारमै निकासी गर्ने भएपनि अमेरिका, अस्ट्रेलिया र खाडी मुलुकमा पनि एसियन फूड्सका बिस्कुटको निर्यात भइरहेको सञ्चालक जाजू बताउँछन् ।
