सर्वोच्च अदालतले यशोदा फुड्सलाई वाइवाइ चाउचाउको ट्रेडमार्क नक्कल नगर्न आदेश दिएको छ । साउन ३२ गते न्यायधिश कुमार रेग्मी र अब्दुल आजिज मुसलमानको संयुक्त इजलासले उक्त आदेश दिएको हो ।
करेन्ट चाउचाउले वाइवाइको ट्रेडमार्क नक्कल गरेपछि यसलाई रोक्न सीजी फुड्स नेपाल लिमिटेड अदालत गएको थियो । उच्च अदालत पाटनले यशोदा फुड्सलाई वाइवाइको ट्रेडमार्क नक्कल नगर्न आदेश दिएको थियो । उक्त आदेश विरुद्द यशोदा फुड्स सर्वोच्च अदालत गएको थियो । सर्वोच्च अदालतले पनि उच्च अदालत पाटनको आदेशलाई सदर गरेको हो ।
यशोदा फुड्सद्वारा उत्पादित करेन्ट चाउचाउले वाइवाइ चाउचाउको ट्रेडमार्क नक्कल गरि वाइवाइ जस्तै देखिने र्यापर प्रयोग गरेर गरेको सीजीको दाबी थियो ।
यशोदा फुड्सले ट्रेडमार्क दर्ता गर्न पनि खोजेको थियो । तर, उच्च अदालतले यशोदा फुड्सको उक्त आवेदन नं. ०९८२२२ को दर्ता प्रकृयालाई रोक्न उद्योग विभागलाई आदेश दिएको थियो ।
यशोदा फुड्सले अब आफ्ना उत्पादन बजारबाट फिर्ता गर्नुपर्ने भएको छ ।
अदालतको यस आदेशले वौद्विक सम्पत्तिको संरक्षण गर्दै यस्तो सम्पत्तिको नक्कल गर्ने प्रवृत्तिलाई निरुत्साहित गर्ने सीजीको विश्वास छ ।
