नेकपा एमालेका अध्यक्ष केपी शर्मा ओली आज प्रधानमन्त्री नियुक्त हुँदैछन् । उनलाई राष्ट्रपति रामचन्द्र पौडेलले आज प्रधानमन्त्रीमा नियुक्त गर्नेछन् ।
प्रधानमन्त्री पुष्पकमल दाहाल प्रचण्डले प्रतिनिधिसभामा विश्वासको मत गुमाएसँगै राष्ट्रपति रामचन्द्र पौडेलले नयाँ सरकार गठनका लागि शुक्रबार नै दलहरूलाई आह्वान गरेका थिए । ओलीले शुक्रबारै नेपाली कांग्रेसको समर्थनमा १६६ सांसदसहित दाबी पेश गरेका छन् ।
राष्ट्रपति पौडेलले दाबी पेश गर्ने समय आज आइतबार साँझ ५ बजेसम्मका लागि दिएका छन् । त्यसपछि राष्ट्रपतिले ओलीलाई प्रधानमन्त्री नियुक्त गर्नेछन् । शपथ भने सोमबारका लागि तय भएको छ ।
ओली चौथो पटक प्रधानमन्त्री बन्न लागेका हुन् । उनले संविधानको धारा ७६ (२) अनुसार गठन हुने गठबन्धन सरकारको नेतृत्व गर्दैछन् ।
