प्रधानमन्त्री पुष्पकमल दाहाल ‘प्रचण्ड’ले सुशासनको अभियान थालेकै कारण आफू नेतृत्वको सरकार ढाल्ने खेल सुरु भएको छ । आजको प्रतिनिधिसभा बैठकमा विश्वासको मत माग्दै उनले त्रिभुवन विश्वविद्यालय, बाँसबारी, बालमिन्दरको जग्गा खोज्न थालेपछि विभिन्न समूहहरू डराउन थालेको बताए ।
“त्रिभुवन विश्वविद्यालयको जग्गा खोज्न थालियो एउटा समूह डरायो, ललितानिवासको विस्तृत अनुसन्धान र जग्गा फिर्तिको प्रक्रिया सुरु हुँदा अर्को समूह डरायो,” उनले भने, “भुटानी शरणार्थी प्रकरणको निष्पक्ष अनुसन्धान सुरु भयो अर्को ठूलै समूह डरायो ।”
प्रचण्डले बाँसबारीदेखि बालमन्दिरसम्मका जमिन खोजी हुन थालेपछि देशको शक्तिसन्तुलन नै खल्बिलिन पुगेको र त्यहीँ शक्तिले कांग्रेस र एमालेलाई मिलाएको दाबी गरे ।
