काठमाडौँ महानगरपालिकाले श्री केश तेलको मुख्य कार्यालयमा छापा मारेको छ । कपाल उमार्ने, झर्नबाट रोक्ने भन्दै ३ हजार रुपैयाँ प्रतिगोटा शुल्क लिएर बिक्री गर्दै आएको श्री केश तेलको कार्यालयमा महानगरले छापा मारेको हो ।
बिना कुनै अध्ययन र वैज्ञानिक प्रमाणित बिना नै जडीबुटीयुक्त तेल भन्दै महँगो शुल्क लिएर तेल बिक्री गरिरहेको भन्दै आलोचना भइरहेका बेला महानगरले कार्यालयमा छापा मारेर तत्कालका लागि बिक्री वितरण बन्द गराएको हो ।
काठमाडौँ महानगरका राजस्व विभागका प्रतिनिधि टंकप्रसाद बरालले आइतबारबाटै तेल बिक्री वितरणमा रोक लगाइएको बताए । उनका अनुसार अध्ययनका लागि केही स्याम्पल लिइएको र ति स्याम्पलका विषयमा अध्ययन गरेर केही दिनभित्रै रिपोर्ट सार्वजनिक गरिने छ ।
कम्पनीको दर्ता प्रक्रिया ठिक भए पनि तेलको गुणस्तर कस्तो छ भन्ने विषयमा अध्ययन गर्न तत्कालका लागि बिक्रि बन्द गरिएको महानगरले जनाएको छ । महानगरका अनुसार ३ दिनका लागि बिक्री वितरण नगर्न र महानगरले सोधेको स्पष्टीकरण बुझाउन भनिएको छ ।
सप्तऋषि आयल एन्ड कस्मेटिक प्रा.लि.ले उत्पादन गर्दै आएको श्री केश तेल १ बोतल तेलको ३ हजार रुपैयाँमा बिक्री वितरण गर्दै आएको छ । महानगरले कार्यालयमा रहेको बोर्ड पनि हटाइदिएको छ ।
