हाइड्रोइलेक्ट्रिसिटी इन्भेष्टमेन्ट एण्ड डेभलपमेन्ट कम्पनी लिमिटेड (एचआईडीसीएल)को नाफा बढेको छ । गत आर्थिक वर्षको चौथो त्रैमाससम्मको वित्तीय विवरण अनुसार कम्पनीले १ अर्ब ४५ करोड ३१ लाख रुपैयाँ खुद नाफा कमाएको छ ।
यो अघिल्लो आर्थिक वर्षको सोही अवधिको तुलनामा ५.६७ प्रतिशतले बढी हो । अघिल्लो आर्थिक वर्षको अन्तिम त्रैमाससम्म कम्पनीले १ अर्ब ३७ करोड ५२ लाख रुपैयाँ खुद नाफा कमाएको थियो ।
नाफासँगै कम्पनीको प्रतिशेयर आम्दानीमा पनि वृद्धि भएको छ । कम्पनीको प्रतिशेयर आम्दानी ३१ पैसाले बढेर ६ रुपैयाँ ३५ पैसा पुगेको छ।
कम्पनीको वित्तीय आम्दानी भने ३.०४ प्रतिशतले घटेर २ अर्ब ८ करोड ५८ लाख रुपैयाँ कायम भएको छ भने लाभांश आम्दानी १९.३७ प्रतिशतले घटेर १ करोड ७ लाख कायम भएको छ ।
कम्पनीको अन्य आम्दानी भने १ लाख ९१ हजार रुपैयाँबाट बढेर १ करोड ९३ लाख रुपैयाँ पुगेको छ ।
असार मसान्तसम्ममा कम्पनीको प्रतिशेयर नेटवर्थ ११३ रुपैयाँ ९५ पैसा रहेको छ । कम्पनीको चुक्ता पूँजी २२ अर्ब ८७ करोड ३९ लाख रुपैयाँ रहेको छ भने जगेडा कोषमा ३ अर्ब १९ करोड १८ लाख रुपैयाँ सञ्चित छ ।
