साताको अन्तिम दिन आज शेयरबजार परिसूचक नेप्से दोहोरो अंकले बढेको छ । आज नेप्से सूचक २९.२१ अंकले बढेर २२०४.६१ को बिन्दुमा पुगेर रोकिएको छ।
आज कारोबारमा आएका ३३१ कम्पनीका २ करोड २ लाख ३७ हजार ७ सय ८० कित्ता शेयर खरिद बिक्रीबाट ७ अर्ब ८ करोड ६ लाख ९८ हजार १ सय ४६ रुपैयाँ ५ पैसाको कारोबार भएको छ। आज सीईडीबी हाइड्रोको सर्वाधिक १५ करोड २५ लाखको कारोबार भएको छ भने ग्लोबल आईएमई बैंकको संस्थापक शेयरको १४ करोड ८८ लाख कारोबार भएको छ। हिमालयन रिइन्स्योरेन्सको १२ करोड ७९ लाखको कारोबार हुँदा सानिमा जीआईसी इन्स्योरेन्सको १२ करोड ६८ लाखको कारोबार भएको छ।
आज बलेफी हाइड्रोको शेयर मूल्य सर्वाधिक ९.९९ प्रतिशत बढेको छ। त्यस्तै सिटिजन सुपर ३० म्युचुअल फण्डको इकाई मूल्य ९.९७ प्रतिशत बढेको छ भने एनआईबिएल स्टेबल ९.६० प्रतिशत बढेको छ । जानकी फाइनान्सको शेयर मूल्य ८.७६ प्रतिशत बढेको छ ।
आज समाज लघुवित्तको शेयर मूल्य सर्वाधिक ४.५९ प्रतिशत घटेको छ भने साधना लघुवित्तको शेयर मूल्य ४.५६ प्रतिशत घटेको छ।
आज कारोबारमा आएका मध्ये लघुवित्त समूह र ट्रेडिङ समूह बाहेकका सबै समूहगत सूचक बढेका छन् । जस मध्ये आज जीवन बीमा समूह सर्वाधिक ३.०६ तथा वाणिज्य बैंक समुह २.४२ प्रतिशत बढेको छ । आज लघुवित्त समूह सर्वाधिक ०.५३ प्रतिशत घटेको छ ।
कांग्रेस एमाले सम्मिलित नयाँ सरकार बन्ने, त्यसमा अर्थ मन्त्रालयले एमालेले पाउने भएपछि पछिल्लो समय शेयर लगानीकर्ता उत्साहित देखिन्छन् । साथै नेपाल राष्ट्र बैंकले विगतको तुलनामा लचिलो मौद्रिक ल्याउने चर्चाले पनि बजार बढेको आँकलन गरिएको छ।
