डोलेश्वर भिलेज रिसोर्ट एण्ड फार्म हाउस लिमिटेडले विशेष साधारणसभा आह्वान गरेको छ । कम्पनीले आईपीओ निष्काशन गर्ने प्रस्ताव पारित गर्नको लागि फागुन १७ गते विशेष साधारणसभा बोलाएको हो ।
कम्पनीले जारी पुँजीको ३० प्रतिशतले हुन आउने १६ लाख २० हजार कित्ता शेयर निष्काशन गर्न लागेको हो। त्यस्तै विशेष साधारणसभाले आईपीओ निष्काशनको लागि सम्पूर्ण कार्य गर्ने अख्तियारी संचालक समितिलाई दिने छ। कम्पनीले आईपीओ निष्काशनको लागि यस अघि नै सिटिजन्स क्यापिटलसँग संस्थागत परामर्श सम्बन्धी सम्झौता गरिसकेको छ ।
२०७६ साल देखि कारोबार सुरु भएको यस रिसोर्ट डोलेश्वर भक्तपुरमा दश रोपनी क्षेत्रफलमा फैलिएको छ । हाल यस रिसोर्टमा १५ वटा कोठाहरु छन् र सो संख्या बृद्धि गरी ३५ वटा कोठा पुर्याउने कार्य र स्वीमिङ पुल पनि निमार्णधीन अवस्थामा रहेको छ र सो निर्माण कार्यहरु यस आर्थिक वर्षभित्र नै सम्पन्न गर्ने लक्ष्य रिसोर्टले लिएको छ । यस रिसोर्टमा ३०० जनासम्मको क्षमता भएको ठूला–साना गरी ३ वटा सभा हलहरु रहेको छ ।
आन्तरिक तथा बाह्य पर्यटकको रोजाईमा पर्न सफल यस रिसार्ट विवाह, ब्रतबन्ध, सेमिनार, गोष्टि तथा पिकनिकको लागि उपयुक्त थलो रहेको छ । यहाँबाट प्रसिद्ध धार्मिक स्थल डोलेश्वर महादेव मन्दिर २०० मिटरको दुरीमा रहेको छ । यस कम्पनीका अध्यक्ष रामनाथ मैनाली हुन्।
