जीवन बीमा कम्पनीहरुले १० महिनाको व्यापार सवा खर्ब नघाएका छन् । चालु आर्थिक वर्षको बैशाख मसान्तसम्ममा कम्पनीहरुको व्यापार ७ अर्ब बढाएका छन् । नेपाल बीमा प्राधिकरणले उपलब्ध गराएको तथ्याङ्कले यस्तो देखाएको हो ।
समिक्षा अवधिमा कम्पनीहरुले कुल १ खर्ब २१ अर्ब ३५ करोड ९५ लाख रुपैयाँ बीमा शुल्क आर्जन गरेका छन् । जुन गत आवको बैशाख मसान्तसम्मको तुलनामा भने ६.२२ प्रतिशत अर्थात् ७ अर्ब ११ करोड ५७ लाख रुपैयाँ बढी हो । गत आवको सोही अवधिमा कम्पनीहरुले कुल १ खर्ब १४ अर्ब २४ करोड ३७ लाख रुपैयाँ बीमा शुल्क आर्जन गरेका थिए । समिक्षा अवधिमा राष्ट्रिय जीवन बीमा र सन नेपाल लाइफको व्यापार क्रमशः २३.९२ प्रतिशत र १.६६ प्रतिशत घटेको छ । यी बाहेकका अन्य कम्पनीहरुले बढाएका छन् ।
जीवन बीमा व्यवसायमा नेपाल लाइफको वर्चश्व कायमै रहेको छ । नेपाल लाइफले सर्वाधिक बीमा शुल्क ३२ अर्ब ३८ करोड १६ लाख रुपैयाँ संकलन गरेको छ ।
तर, व्यवसायमा नेशनल लाइफ र लाइफ इन्स्योरेन्स कर्पोरेशन नेपाल (एलआइसी) बीच कडा टक्कर देखिएको छ। यी दुवै कम्पनीहरुको बीमा शुल्क आर्जनमा प्रतिस्पर्धा देखिएको हो । समिक्षा अवधिमा नेशनल लाइफले १४ अर्ब ३३ करोड १४ लाख रुपैयाँ र एलआइसी नेपालले पनि १४ अर्ब २३ करोड ५९ लाख रुपैयाँ बीमा शुल्क आर्जन गरेका छन् । तर, व्यवासयी वृद्धिमा भने नेशनल लाइफ नै अघि देखिएको छ । व्यवसायको आधारमा भने चौंथो नम्बरमा हिमालयन लाइफ छ । हिमालयन लाइफको बीमा शुल्क आर्जन ९.८१ प्रतिशत बढेर १३ अर्ब ५१ करोड रुपैयाँ कायम भएको छ ।
यस्तै, १० महिनामा सूर्यज्योति लाइफले ७ अर्ब २७ करोड ४० लाख, एशियन लाइफले ६ अर्ब ३८ करोड ७० लाख, राष्ट्रिय जीवन बीमा कम्पनीले ५ अर्ब ७६ करोड ७१ लाख, सिटिजन लाइफले ४ अर्ब ७० करोड १४ लाख, सानिमा रिलायन्सले ४ अर्ब ६९ करोड ४२ लाख र मेट लाइफले ४ अर्ब ५७ करोड ५४ लाख रुपैयाँ बीमा शुल्क आर्जन गरेका छन् ।
यता, आइएमई लाइफले ३ अर्ब ६५ करोड ६ लाख, प्रभु महालक्ष्मीले ३ अर्ब ४१ करोड ५८ लाख, रिलायवल नेपालले ३ अर्ब ३४ करोड ७५ लाख र सन नेपाल लाइफले ३ अर्ब ८ करोड ६९ लाख रुपैयाँ बीमा शुल्क आर्जन गरेका छन् ।
