इन्डोनेशियाको टुरिजम तथा क्रियटिभ इकोनोमी मन्त्रालयका पर्यटन उपमन्त्री नी माडे आयु मार्थिनी र नेपाल पर्यटन बोर्डका कार्यकारी प्रमुख दीपकराज जोशीबीच दुई देशको पर्यटन प्रर्वद्धन तथा आपसी सहकार्यका विषयमा छलफल भएको छ ।
नेपाल पर्यटन बोर्डमा शुक्रबार भएको भेटघाटमा उपमन्त्री नी माडे आयु मार्थिनीले नेपालको कला संस्कृति र सुन्दरताले आफु मोहित भएको बताउँदै नेपालको पर्यटन प्रर्वद्धनका लागि आफ्नो तर्फबाट सहयोग गर्ने प्रतिवद्धता व्यक्त गरेका छन् ।
“नेपाल साच्चिकै सुन्दर देश रहेछ, यहाँको आतिथ्यता र यहाँका मानिहरुको व्यवहारले म साच्चिकै मोहितत भएकी छु’ उनले भनिन्, ‘नेपालमा पर्यटनको पर्याप्त सम्भावना देखेकी छु । नेपालको पर्यटन प्रर्वद्धनका लागि म आफ्नो तर्फबाट सक्दो प्रयास गर्ने प्रतिद्धता व्यक्त गर्दछु ।”
नेपाल पर्यटन बोर्डका कार्यकारी प्रमुख दीपकराज जोशीले नेपाल इन्डोनेशियाबीच सौहार्दपूर्ण सम्बन्ध रहेको उल्लेख गर्दै आपसी सहकार्यका लागि पर्यटन बोर्ड र नेपाल सरकार सधैं तयार रहेको बताए ।
“नेपाल र इन्डोनेशियाबीच पर्यटन प्रर्वद्धनको लागि विगतमा पनि सहकार्य थियो, हामी त्यो सहकार्यको निरन्तता चाहन्छौं । जसबाट नेपालको पर्यटन प्रर्वद्धन हुन सकोस्’’ उनले भने । ।।
उनले दुइ देशबीच सिँधा र नियमित हवाई उडान गर्न सके दुवै देशले पर्यटनबाट फाइदा लिन सक्ने पनि बताए ।
सो अवसरमा नेपाल र बंगलादेशका लागि इन्डोनेशियाका राजदूत हेरु हर्तान्नो सुबोलोले इन्डोनेसियाको पर्यटन बोर्ड तथा नेपाल पर्यटन बोर्डबीच सहकार्यका गर्नुपर्नेमा जोड दिँदै दूवै देशलाई फाइदा पुग्ने गरि प्रर्वद्धनात्मक कार्यक्रम गर्न सकिने धारणा राखे ।
सो अवसरमा नेपाल पर्यटन बोर्डका वरिष्ठ निर्देशक नन्दिनी लाहे थापा, निमित्त बजार निर्देशक लक्ष्मण गौतम तथा पर्यटन बोर्डका अधिकारी तथा इन्डोनेशिया राजदूतावासका कर्मचारीहरुको सहभागिता रहेको थियो ।
