सुनसरीको इटहरीमा पाँचतारे होटल सञ्चालन गरिरहेको ग्रान्ड सेन्ट्रल होटल लिमिटेडले ४ महिनामै ४ करोड १० लाख रुपैयाँ आम्दानी गरेको छ । गत चैत महिनाबाट पूर्ण सञ्चालनमा आएको रमडा इटहरीले ४ महिना (चैतदेखि असारसम्म) मा ४ करोड १० लाख रुपैयाँ आम्दानी गरेको हो ।
कम्पनीले सुनसरीको इटहरीमा ८१ कोठा क्षमताको ‘रमाडा बाई विन्डह्याम इटहरी’ नाम दिएर पाँचतारे होटल सञ्चालन गरिरहेको छ । यो होटल पूर्वी नेपालकै पहिलो अन्तर्राष्ट्रिय चेन होटल हो ।
कम्पनीमा देशबन्धु बस्नेत मुख्य लगानीकर्ता छन् । उनका अनुसार रमडा बाई विन्डह्याम इटहरी नेपाल–भारत सीमाबाट जम्मा ३० किलोमिटर दूरीमा अवस्थित छ । यस होटलले नियमित घुम्न निस्कने भारतीय पर्यटकसहित बिबाह गर्न नेपाल आउने भारतीयहरुलाई आकर्षित गरिरहेको छ ।
आन्तरिक रुपमा पनि इटहरी क्रमशः ट्रान्जिट बन्दै गरेको शहर भएकाले व्यवसायिक गतिविधि बढिरहेको छ । यसको लाभ होटलले लिइरहेको देखिन्छ ।
कम्पनीले विभिन्न बैंक तथा वित्तीय संस्थाबाट १ अर्ब ३७ करोड रुपैयाँ ऋण लिएको छ । अहिले अकुपेन्सी क्रमशः बढिरहेको कम्पनीले जनाएको छ । नेपाली, भारतीय, बंगलादेशीसहित अन्य विभिन्न देशका पर्यटकहरु होटलमा आउने र बस्ने क्रम तीव्र भइरहेको ‘रमडा बाइ विन्डम इटहरी’का महाप्रबन्धक अभिमन्यु कायस्थ बताउँछन् ।
‘रमडा बाइ विन्डम इटहरी’मा ८१ वटा कोठा छन् । जसमा डिलक्स सिंगल रुम ५७, डिलक्स डबल रुम १४, एक्जिक्युटिभ रुम २, जुनियर स्वीट रुम ६ र स्वीट रुम २ वटा छन् ।
