पर्यटन विभागले ३ वटा क्यासिनोको इजाजत रद्द गरेको छ । विभागले होटल अन्नपूर्णमा क्यासिनो सञ्चालन गर्दै आएको एटलान्टिक रिक्रियशन प्रा.लि., भैरहवाको टाइगर प्यालेस र लजिम्पाटको होटल साङ्ग्रिलामा क्यासिनो चलाइरहेको सिल्भर हेरिटेज म्यानेजमेन्ट सर्भिसेज ‘केटिएम’ प्रा.लि.को क्यासिनो सञ्चालन गर्ने इजाजत रद्द गरिएको हो ।
पर्यटन विभागका सूचना अधिकारी कालिबहादुर भुजेलका अनुसार सिल्भर हेरिटेज म्यानेजमेन्ट सर्भिसेज ‘केटिएम’ले भैरहवाको टाइगर प्यालेस र लजिम्पाटको होटल साङ्ग्रिलामा क्यासिनो नचलाउने निर्णय गरेर विभागमा क्यासिनो इजाजत रद्दका लागि निवेदन दिएपछि विभागले रद्द गर्ने निर्णय गरेको हो । यस कम्पनीले विभागलाई विगत ४ वर्षदेखि दस्तुर तथा क्यासिनो चलाएबापतको कर तिर्न सकिरहेको थिएन । अहिले भने सबै बक्यौता चूक्ता गराएर इजाजत रद्द गरिदिएको विभागका सूचना अधिकारी भुजेलको भनाइ छ ।
‘बक्यौता बाँकी थियो, उ आफैँ (सिल्भर हेरिटेज म्यानेजमेन्ट सर्भिसेज ‘केटिएम’ प्रा.लि.)ले दूबै होटलमा क्यासिनो नलाउने निर्णय गरेर इजाजत रद्द गरिदिन विभागमा अनुरोध पठायो, विभागले बक्यौता उठाएर इजाजत रद्द गरिदिएको हो’ उनले भने ।
सूचना अधिकारी भुजेलका अनुसार भैरहवाको टाइगर प्यालेसमा अर्को क्यासिनो आइसकेको छ । उक्त होटलमा अहिले रोयल टाइगर रिक्रियशनले क्यासिनो व्यवस्थापन सम्हालेको छ । उसले विभागलाई ५४ करोड रुपैयाँ बुझाएर क्यासिनो व्यवस्थापन सुरु गरेको हो । गत वर्ष हिमालयन टाइगर इन्भेष्टमेन्टले भैरहवाको टाइगर प्यालेस होटल किनेपछि क्यासिनो व्यवस्थापनमा पनि नयाँ कम्पनी प्रवेश गरेको हो ।
होटल साङ्ग्रिला भने अहिले बन्द अवस्थामा छ । नयाँ तरिकाबाट सञ्चालन गर्ने भन्दै अहिले उक्त होटल पुनःनिर्माण भइरहेको छ ।
होटल अन्नपूर्ण पनि अहिले बन्द छ । होटल बन्द भएको लामो समय भएपनि क्यासिनो भने चलिरहेको थियो । तर, होटल बन्द हुँदा क्यासिनो पनि चल्न नसकेपछि एटलान्टिक रिक्रियशन प्रा.लि.ले क्यासिनो इजाजत रद्द गर्न चाहे अनुसार विभागले रद्द गरिदिएको हो ।
यसैबीच, चालु आर्थिक वर्ष २०८१/०८२ का लागि २ वटा क्यासिनोको इजाजत नवीकरण हुन बाँकी छ । विराटनगरस्थित रत्न होटलमा क्यासिनो चलाइरहेको रत्न सर्भिसेज प्रा.लि. र सिमरास्थित होटल इच्छामा क्यासिनो चलाइरहेको स्माइल कलेक्शन प्रा.लि.ले विभागबाट नवीकरण गराउन बाँकी छ । स्माइल कलेक्शनले भने बक्यौता तिरेर नवीकरणको प्रक्रिया अघि बढाएको विभागले जनाएको छ ।
हरेक आर्थिक वर्षमा क्यासिनो नवीकरण हुनुपर्ने प्रावधान छ । नेपालमा २२ वटा क्यासिनो सञ्चालनमा रहेकोमा ३ वटाको इजाजत रद्द भएपछि अब १९ वटा सञ्चालनमा छन् ।
