होटल व्यवसायीहरुले नेपालमा आउने पर्यटकहरुबाट अधिकतम् खर्च गराउन हाम्रो आफ्नै नीतिहरु बाधक भएको बताएका छन् । पाँचतारे होटल सञ्चालकहरूले नेपालमा खर्चालु पर्यटक भित्र्याउन सकिने र भित्रिरहेको भएपनि उनीहरुलाई खर्च गराउन हाम्रो नीति खर्चमैत्री हुन आवश्यक रहेको बताएका छन् ।
होटल एसोसिएसन नेपाल (हान) अन्तर्गतको पाँचतारे होटल समितिले आगामी आर्थिक वर्ष २०८१/०८२ को मौद्रिक नीतिमा सुझाव दिँदै नेपालमा खर्चालु पर्यटक भित्र्याउन उनीहरुले खर्च गर्न पाउने सीमामा अघोषित रुपमा लगाइएको बन्देज बाधक रहेको बताएका हुन् ।
होटल सांग्रिलाका प्रबन्ध निर्देशक प्रविणबहादुर पाण्डेले हाल मुद्रा सटहीमा रहेको प्रतिदिन ३ सय अमेरिकी डलरको सीमा बढाउनुपर्ने बताएका छन् । होटललाई डलर सटही सुविधा दिएसँगै हरेक दिन ३ सय डलरको सीमा राखिएको भन्दै उनले यसबाट क्यासिनोको व्यवसायमा समेत असर पुगिरहेको बताए । उनले यहीँ सीमाका कारण पर्यटकले गर्ने खर्चमा समेत सिमित हुन गइ आफ्नै देशको आर्जन घटिरहेको भन्दै यो सीमा हटाउनुपर्ने बताएका छन् ।
उनका अनुसार सन् २०२० लाई सरकारले भ्रमण वर्ष घोषणा गरेका बेला होटलमा धेरै लगानी भएको छ । तर, कोभिडका कारणले भ्रमण वर्ष अभियान रोकिएको र कोभिड महामारीले होटल तथा पर्यटन क्षेत्रलाई नराम्रोसँग प्रभाव पारेको भन्दै पाण्डेले मौद्रिक नीतिले यतातर्फ ध्यान दिनुपर्ने बताएका छन् ।
सन् २०२३ पछि पर्यटक आगमनका केही सुधार आएको तर, पूर्ववत् अवस्थामा फर्किन अझै केही समय लाग्ने देखिएको उनको भनाइ छ । पछिल्लो समय बंगलादेशबाट आउने पर्यटकको संख्या बढ्ने क्रममा रहेको भन्दै पाण्डेले नेपालमा बंगालादेशी मुद्रा टाकामा कारोबार गर्न सक्ने प्रावधान ल्याउन पनि सुझाव दिएका छन् ।
होटल मेरियटका सञ्चालक शशिकान्त अग्रवालले भारतीय पर्यटकले नेपालमा आउँदा भारु २५ हजार मात्र बोकेर आउन सक्ने प्राधावनलाई पनि पुनरावलोकन गर्नुपर्ने आवश्यकता औल्याएका छन् । नेपाल आउने पर्यटकमध्ये सबैभन्दा धेरै भारतीय पर्यटक रहेपनि उनीहरुबाट हुने खर्च सिमित रहेकाले भारतीय पर्यटकले बोक्न पाउने नगदको सीमालाई २ लाखसम्म पुर्याउनुपर्ने अग्रवालको माग छ ।
उनले भारतका ठूला दरका नोट नेपालमा नचल्दा पनि समस्या भइरहेको बताउँदै उनीहरुले ठूला दरका नोट पनि साथमा बोकेर आउन पाउने र ति दरका नोटहरु चल्ने व्यवस्था गर्न माग गरेका छन् । ‘ठूला नोट चल्ने अवस्था हुने हो भने भारतीय पयटकले नेपालमा गर्ने खर्च बढ्ने देखिन्छ’ उनले भने ।
होटल हिमालयका प्रबन्ध निर्देशक दिनेश तुलाधरले कोभिडको प्रभाव होटल क्षेत्रमा अझै कायम रहेको र केही समय अझै कायम रहने देखिएको बताउँदै होटलका लगानीकर्ताले बैङ्कबाट लिएको ऋण पुनर्तालिकीकरण गर्न माग गरेका छन् ।
होटल मेची क्राउनका सञ्चालक बलराम सापकोटाले भारतीय पर्यटकलाई खर्चमा सीमा तोकिँदा नेपालका होटलहरु समस्यामा परेको बताएका छन् । होटललाई करोडौँ रोयल्टी तोक्ने तर, खर्चमा सीमा लगाउने काम व्यावहारिक नभएको सापकोटाको भनाइ छ ।
यस्तै, होटल व्यवसायीहरुले विमानस्थलमा ‘ड्युटी फ्री’ पसल राख्न पनि सुझाएका छन् । काठमाडौँसहित देशका ३ वटै अन्तराष्ट्रिय विमानस्थलमा ‘ड्युटी फ्री’ पसल राख्नुपर्ने उनीहरुको सुझाव छ ।
साथै, एयरलाइन्स कम्पनीहरुलाई केही सहुलियत र छुट दिएर भएपनि नयाँ बनेका पोखरा र भैरहवा अन्तराष्ट्रिय विमानस्थल सञ्चालन गर्नुपर्ने बताउँदै व्यवसायीहरुले ति क्षेत्रमा पर्यटक आकर्षित गर्नुपर्ने बताएका छन् ।
