कर वृद्धिको विरोधमा हेटौँडा उपमहानगरका व्यवसायीहरु व्यवसाय बन्द गरेर आन्दोलनमा उत्रिएका छन् । मकवानपुर उद्योग वाणिज्य संघको नेतृत्वमा व्यवसायीहरु आन्दोलनमा उत्रिएका हुन् ।
व्यवसायीहरूले शुक्रबार आफ्ना व्यवसाय बन्द गरेर उपमहानगरपालिकाको कार्यालयमा धर्ना दिएका हुन् । उनीहरुले आफ्ना व्यवसायिक सटर तथा पसलको साँचो उपमहानगरपालिकालाई बुझाउने तयारी गरेका छन् ।
व्यवसायीहरूलाई प्रहरीले कार्यालय प्रवेशमा रोक लगाएपनि व्यवसायीहरू प्रहरीलाई धकलेर परिसरभित्र प्रवेश गरेका छन् । कार्यालय परिसरबाटै व्यवसायीहरूले नाराबाजी गरिरहेका छन् ।
संघका उपाध्यक्ष उज्वल चौलागाईंले व्यवसायीलाइ उत्तेजित बनाउन प्रहरी परिचालन गरिएको भन्दै जुनसुकै खालका घेरा तोड्ने चेतावनी दिएका छन् ।
मकवानपुर उद्योग वाणिज्य संघको नेतृत्वमा निर्माण व्यवसायी संघ, जिल्ला सहकारी संघसहित जिल्लास्थित १६ वटा विषयगत व्यवसायिक संस्थाका व्यवसायी कर वृद्धिको विरोधमा आन्दोलनमा छन् ।
