नेपालको वैदेशिक ब्यापार घाटामा उल्लेख्य सुधार देखिएको छ । खासगरी, सुस्त रहँदै आएको निर्यात पछिल्लो १० महिनामा उल्लेख्य रुपमा वृद्धि भएको भन्सार विभागको तथ्यांकले देखाएको छ ।
भन्सार विभागका अनुसार चालु आर्थिक वर्ष २०८१/०८२ को १० महिना (साउनदेखि बैशाखसम्म)मा २ खर्ब १७ अर्ब ९१ करोड १० लाख बराबरको वस्तु तथा सेवा निर्यात भएको छ । यो भनेको गत आर्थिक वर्षको यहीँ अवधिको तुलनामा ७२.७१ प्रतिशतले बढी हो । गत आर्थिक वर्षको १० महिनामा १ खर्ब २६ अर्ब १७ करोडको मात्रै निर्यात भएको थियो ।
तीन वर्षअघि १२ महिना (एक वर्ष)मा २ खर्बको निर्यात भएकोमा यसवर्ष १० महिनामै नेपालको निकासी २ खर्ब नाघेको हो । यो हालसम्मकै उच्च हो ।
भन्सार विभागका अनुसार चालु आर्थिक वर्षको १० महिनामा आयात भने गत वर्षको १० महिनाको तुलनामा १३.११ प्रतिशतले बढेर १४ खर्ब ७४ अर्ब १८ करोड ८२ लाख पुगेको छ । यस अवधिमा नेपालको ब्यापार घाटा १२ खर्ब ५६ अर्ब २७ करोड रुपैयाँ पुगेको छ । निर्यात बढेपनि गत आर्थिक वर्षको १० महिनाको तुलनामा नेपालको ब्यापार घाटा ६.७२ प्रतिशतले बढेको छ ।
