आईपीओ निष्काशनको तयारीमा रहेको राजेश मेटल क्राफ्ट्स लिमिटेडले गत वर्ष ४ अर्ब बढी आम्दानी गरेको छ । कम्पनीले व्यवसायबाट आर्थिक वर्ष सन् २०२४ मा ४ अर्ब ७ करोड ३० लाख आम्दानी गरेको हो।
माग र बिक्रीमा आएको कमीको कारण कम्पनीको आम्दानी भने घटेको छ। सन् २०२२ मा कम्पनीको आम्दानी ८ अर्ब ५६ करोड रहेकोमा आर्थिक वर्ष २०२३ मा घटेर ४ अर्ब ४५ करोड पुगेको थियो। सन् २०२४ मा अझै घटेर ४ अर्ब ७ करोड मात्र कायम भएको छ। आर्थिक वर्ष सन् २०२५ को पहिलो ६ महिनामा भने कम्पनीको बिक्री बढेर आम्दानी २ अर्ब ६३ करोड पुगेको छ।
यो कम्पनी आरएमसी ग्रुप अन्तर्गतको कम्पनी हो । कम्पनीको सम्पूर्ण शेयर स्वामित्व राजेश कुमार अग्रवाल र विष्णु कुमार अग्रवालसँग रहेको छ। कम्पनीले स्टील, स्टील पाता, तथा स्टील पाएपहरु उत्पादन गर्दै आएको छ।
सन् १९९२ मा पब्लिक कम्पनीको रुपमा दर्ता भएको यो कम्पनी सन् २०१६ मा प्रालि बनेको थियो । अब फेरि पब्लिक कम्पनी बनेर शेयर निष्काशन गर्ने तयारी गरेको हो । कम्पनीको गत पुस २५ गते सम्पन्न साधारणसभाले बुक विल्डिंग विधिबाट आईपीओ निष्काशन गर्ने प्रस्ताव पारित गरिसकेको छ ।
कम्पनीले टिनको कन्टेनर निर्माताको रूपमा व्यवसाय सुरु गरेकोमा पछि आफ्नो उत्पादन पोर्टफोलियो विस्तार गरी अहिले पाइप, सिट, शटर, र पोलजस्ता १७ भन्दा बढी विभिन्न प्रकारका मेटल उत्पादनहरू गरिरहेको छ। आईपीओ निष्काशनबाट ऋण घटाउने र व्यवसाय विस्तार गर्ने कम्पनीको योजना छ । आर्थिक वर्ष सन् २०२४ को अन्त्यसम्ममा कम्पनीको ऋण १ अर्ब १३ करोड रहेको छ । अघिल्लो वर्ष कम्पनीको ऋण २५ करोड ९० लाख मात्र थियो ।
कम्पनीको कारखाना बारा जिल्लाको सिमरास्थित चोरनीमा अवस्थित छ, जुन वीरगन्ज-रक्सौल भन्सार, भारत-नेपाल सीमाबाट करिब २० किलोमिटर टाढा छ। कम्पनीलाई आवश्यक पर्ने अधिकांश कच्चा पदार्थ भारतबाट आयात हुन्छ, कम्पनीको कारखाना भन्सार नजिकै हुनुले ढुवानी लागतमा बचत भएको छ । कारखानाको भारतीय सीमासँगको निकटताले निर्यातलाई पनि सहज बनाएको छ।
इन्फोमेरिक्सले हालै कम्पनीको रेटिंग गरेर कम्पनीलाई BBB+ को रेटिंग प्रदान गरेको छ ।
