नेपाल विद्युत प्राधिकरणले खुलाएको सौर्य उर्जा उत्पादनको ठेक्का पक्रियाको विवादमा उच्च अदालत पाटनले अन्तरिम आदेश जारी नहुने आदेश सुनाएको छ । आज न्यायधीशद्वय सुदर्शनदेव भट्ट र डिल्लीरत्न श्रेष्ठको संयुक्त इजलाशले अन्तरिम आदेश जारी नहुने आदेश सुनाएको हो ।
यस अघि अदालतले सम्पूर्ण ठेक्का प्रक्रिया अगाडी नबढाई यथास्थितिमा राख्न अन्तरिम आदेश दिएको थियो । तर, सो अन्तरिम आदेशलाई चुनौती दिँदै ठेक्का पाउन लागेको पक्ष पनि अदालत पुगेको थियो ।
ठेक्का पाउन लागेकामध्ये २ वटा कम्पनी अदालतले दिएको अन्तरिम आदेश खारेजीको माग गर्दै अदालत गएका थिए । टेरा सोल ईनर्जी कम्पनी र सोलाएरिस ईनर्जी प्रा.लि.ले उच्च अदालत पाटन मै मङ्सिर ४ गते मुद्दा दर्ता गरेका थिए । उनीहरुले सरोकारवाला कायम गराई पाउँ भन्ने आदेश माग गरेकोमा आजको संयुक्त इजलाशले निवेदकको माग बमोजिम हुने अन्तिम आदेश सुनाएको छ ।
अदालतले यसअघि ठेक्का प्रक्रिया अगाडी नबढाई यथास्थितिमा राख्न अन्तरिम आदेश दिएकोमा आज अन्तरिम आदेश जारी नहुने निर्णय सुनाएको हो । यससँगै अब प्राधिकरणले प्रदान गरेको लेटर अफ इन्टेन्ट–एलओआई (आशयपत्र) अनुसार ठेक्का पाउन लागेका कम्पनीले काम सुरु गर्ने बाटो खुलेको छ । लिखित आदेश भने आइतबार मात्रै आउने देखिएको छ ।
यस अघि उच्च अदालत पाटनले सौर्य उर्जा उत्पादनको ठेक्का पक्रिया रोक्न नेपाल विद्युत प्राधिकरणलाई अन्तरिम आदेश दिएको थियो । टेण्डर प्रक्रियामा चलखेल भएको दाबी गर्दै उच्च अदालत पाटनमा छुट्टाछुट्टै दुई वटा मुद्दा परेका थियो । ति मुद्दामा सुनुवाई गर्दै उच्च अदालत पाटनले ठेक्का प्रक्रिया यथास्थितिमा राख्न आदेश दिएको थियो ।
ठेक्का प्रक्रियामा चलखेल भएको भन्दै कार्तिक २१ गते सस्टेनेबल इनर्जी भेन्चर्स प्रा.लि.ले अदालतमा मुद्दा दायर गरेको थियो । त्यस्तै कार्तिक २७ गते सस्टेनेबल इनर्जी भेन्चर्स प्रा.लि. र यम्ब्लिंग हाइड्रोपावर लिमिटेड जे.भी.ले संयुक्त रुपमा मुद्दा दायर गरेका थिए ।
