नेपाल विद्युत प्राधिकरणले प्राधिकरणको हालको अवस्था सहितको श्वेतपत्र सार्वजनिक गरेको छ । कार्यकारी निर्देशक हितेन्द्रदेव शाक्यले प्राधिकरणको वित्तीय अवस्था सहित आगामी दिनमा गर्नुपर्ने काम समेत समेटेर श्वेतपत्र सार्वजनिक गरेका हुन् ।
श्वेतपत्रमा उल्लेख भएको विवरण अनुसार प्राधिकरणको आर्थिक अवस्था दयनीय देखिएको छ । हितेन्द्रदेव शाक्य आफैँले प्राधिकरण टाट पल्टिएको अवस्थामा रहेको र सरकारले सहयोग नगरे अवस्था झन जटिल हुने बताएका छन् ।
यतिसम्म की, अहिले प्राधिकरणसँग तत्कालै भूक्तानी दिनुपर्ने दायित्व सकार्ने पैसा समेत नरहेको तथ्य श्वेतपत्रमा उजागर गरिएको छ । कार्यकारी निर्देशक शाक्यका अनुसार हाल प्राधिकरण ५ अर्ब २६ करोड नोक्सानीमा छ ।
आर्थिक वर्ष २०८०÷०८१ सम्म प्राधिकरणको कुल सञ्चित नाफा करिब ४६ अर्ब ४७ करोड रुपैयाँ रहेको छ । चालु आवको फागुन मसान्तसम्म ९ अर्ब ४८ करोड रुपैयाँ नाफा भएको तर आयकर ऐनको प्रावधान अनुसार थप हासकट्टीको दाबी सहितको नाफा नोक्सान गणना गर्दा हालसम्म कुल ५ अर्ब २६ करोड नोक्सानी रहेको कार्यकारी निर्देशक शाक्यले बताए ।
महालेखा परीक्षकको कार्यालयले औल्याएका बुँदाहरु मध्ये संस्थाले ७ अर्ब १९ करोड रुपैयाँ खर्च नलेखेको र ४ अर्ब ७२ करोड रुपैयाँ आम्दानी बढी लेखाङ्कन गरेको तथा २९ अर्ब ९१ करोड आम्दानी नबाँधेको देखिएको छ ।
‘महालेखाको प्रतिवेदनमा औल्याइएको कैफियत र नेविप्राले तयार गरेको वासलात तथा नाफा नोक्सान विवरण आदिमा मुलभूत रुपमा फरक पर्न गएकोले यस संस्थाको वास्तविक आर्थिक अवस्था पहिचान गर्ने प्रस्तुत तथ्याङ्कको विश्वसनियता कायम गर्ने हेतुले प्राधिकरणको वित्तीय, प्राविधिक तथा व्यवस्थापकीय पक्षहरूको विस्तृत मूल्यांकन लगायत सम्पत्ति तथा दायित्वको यथार्थ अवस्था सुनिश्चित गर्नका लागि सम्पत्ति दायित्व मूल्यांकन (डीडीए) को प्रक्रिया अगाडि बढाइनेछ’ कार्यकारी निर्देशक शाक्यले भने ।
यस्तै, प्राधिकरणको निर्माणाधीन प्रशारण र वितरण संरचना पूरा गर्न १ खर्ब २२ अर्ब लाग्ने अनुमान गरिएको छ ।
यसैगरी, ठेक्कापट्टाबापत तत्कालै भूक्तानी दिनुपर्ने ११ अर्ब ६१ करोड रुपैयाँको बिल आएपनि निर्माण व्यवसायीलाई उक्त रकम भूक्तानी दिन नसकिएको पनि श्वेतपत्रमा उल्लेख छ । साथै, यसका लागि प्राधिकरणले तत्काल १० अर्ब ऋण लिने प्रक्रिया सुरु गरेको पनि बताइएको छ ।
पूर्णपाठः
