प्रभु हेलिकप्टर कम्पनी स्थापनाको १०औँ वर्षमा प्रवेश गरेको छ । कम्पनी १०औँ वर्षमा प्रवेश गरेको अवसरमा कम्पनीका अध्यक्ष सुभाष अमात्यले एक दशकको यात्रामा साथ र सहयोग प्रदान गर्ने सबैमा आभार व्यक्त गर्दै भविष्यमा पनि अझै गुणस्तरीय र सर्वसुलभ सेवा प्रदान गर्ने प्रतिवद्धता जनाएका छन् ।
१० वर्ष अघि तत्कालीन मुक्तिनाथ हेलिकप्टरका नामबाट सञ्चालित कम्पनीलाई प्रभु ग्रुपले २०७२ सालमा किनेको थियो । एक थान ‘रोबिन्सन’ हेलिकप्टरबाट व्यावसायिक यात्रा सुरु गरेको प्रभुसँग अहिले दुई थान ‘एयरबस एच१२५’ हेलिकप्टर छन् ।
कम्पनीले हाल पोखरा, काठमाडौं र लाङटाङ क्षेत्रमा सेवा उपलब्ध गराइरहेको छ । कम्पनीले मुक्तिनाथ, गोसाइँकुण्ड, कालीञ्चोक भगवती र लुम्बिनीमा पनि हेलिकप्टर टुर उपलब्ध गराउँदै आएको छ ।
सगरमाथा, अन्नपूर्ण र माछापुच्छ«े हिमालको आधार शिविरमा पनि हवाई उडान गर्नुका साथै उद्धार लगायत सेवा पनि उपलब्ध गराउँदै आएको छ ।
सुरुमा कम्पनी ऐन २०६३ अन्तर्गत एक निजी लिमिटेड कम्पनीका रूपमा समावेश गरिएको प्रभु हेलिकोप्टर प्रा.लि. २०७९ असार ३० गतेदेखि पब्लिक लिमिटेड कम्पनीमा रूपान्तरण भएको थियो । कम्पनीसँग पोखरामा आफ्नै ह्यांगर समेत छ ।
प्रभु हेलिकप्टर लिमिटेडले सर्वसाधारणका लागि आईपीओ निष्काशन गर्ने तयारी पनि अघि बढाइसकेको छ । यसका लागि कम्पनीले बिक्री प्रबन्धकमा मुक्तिनाथ क्यापिटललाई नियुक्त गरिसकेको छ ।
