नाडा अटोमोबाइल्स एसोसिएसन अफ नेपालको विशेष साधारणसभा रोक्न स्थानीय प्रशासनले उर्दी जारी गरेको छ । भदौ २४ गतेका लागि डाकिएको विशेष साधारणसभा रोक्न जिल्ला प्रशासन कार्यालयले निर्देशन दिएपछि नाडाभित्र अन्योलको अवस्था सिर्जना भएको छ ।
गत साधारणसभाबाट चुनिएका वरिष्ठ उपाध्यक्ष आकाश गोल्छालाई अध्यक्ष करण चौधरीले कार्यसमिति बैठकसमेत नराखी सदस्यमा घटुवा गरिदिएपछि उत्पन्न विवाद उत्कर्षमा पुगिरहेकै बेला नाडाको विशेष साधारणसभा आह्वान गरिएको थियो । महासंघमा रुपान्तरण हुने निर्णयलाई पारित गराउन विशेष साधाणसभा बोलाइएको थियो । तर, जिल्ला प्रशासन कार्यालयले उक्त विशेष साधारणसभा रोकेर एक हप्ताभित्र उपस्थित हुन निर्देशक दिएपछि अन्योल उत्पन्न भएको हो ।
‘उपरोक्त सम्बन्धमा गैरकानूनी तरिकाले बोलाउन लागिएको विशेष साधारण सभा रोकी पाउँ भनी यस कार्यालयमा मिति २०८२/०५/१६ मा निवेदन दर्ता भएकोले विधान बमोजिम वार्षिक साधारणसभा नबोलाई के–कति कारणले विशेष साधारणसभा गर्न लागिएको हो ? जिल्ला प्रशासन कार्यालयमा पटक–पटक विधान संशोधनको विषयमा छलफल भए पनि हालसम्म विवाद समाधान नहुनुको कारण के हो ?’ प्रशासनले नाडालाई सोधेको छ, ‘विशेष साधारणसभा बोलाउनको लागि गरिएका निर्णयहरु सहित ७ (सात) दिनभित्र यस कार्यालयमा उपस्थित हुनु हुन र हाल गर्न लागिएको भनिएको विशेष साधारणसभा स्थगित गर्नुहुन निर्णयानुसार अनुरोध छ ।’
