यातायात व्यवस्था विभागले नाडा अटोमोबाइल्स एसोसियशन अप नेपाललाई जथाभावी पत्र लेख्दै हिडेको आरोप लगाउँदै सवारी आयातमा विभागबाट कुनै अवरोध नरहेको दाबी गरेको छ । नाडाले असार २६ गते पठाएको पत्रको जवाफ दिँदै विभागले सवारी आयातको अनुमतिको विषयमा मन्त्रालय र चिनियाँ दूतावास गुहारेको भन्दै असन्तुष्टि जनाएको छ ।
तर, नाडालाई लेखेको पत्रमा विभागले आफूसँग विद्युतीय सवारीमा हुने मोटरको पीक पावर जाँच गर्ने प्रविधि नरहेको स्वीकार गरेको छ । ‘विद्युतीय सवारीमा मोटरको अधिकतम क्षमताको आधारमा भन्सार महसुल कायम गरिएको र नेपालमा मोटरको पिक पावर जाँच गर्ने प्रविधि उपलब्ध नभएको कारण भन्सार महशुल छल्ने प्रयोजनका लागि सवारीको मोटर पावर मोडिफिकेशन गर्न सक्ने वा कागजातमा मात्र मोटर पावर न्यून देखाउन सक्ने अवस्था विद्यमान छ’ विभागले भनेको छ ।
विभागले कागजातको आधिकारिकता जाँच गर्न थप कागजात समेत माग गर्ने गरिएको र इमेलबाट समेत पुष्ट्याई खोज्ने गरिएको जनाएको छ । तर, नियम अनुसार कागजात प्राप्त भएका कुनै पनि फर्म वा कम्पनीको सवारी आयात प्रक्रियामा अवरोध नभएको विभागको दाबी छ ।
