कृषि तथा पशुपंक्षी विकासमन्त्री रामनाथ अधिकारीले किसानहरुले समयमै मल नपाउने समस्या सधैँभरी रहिरने आशय व्यक्त गरेका छन् । नेपाल डेरी एसोसिएसनले बिहिबार आयोजना गरेको दही चिउरा प्रवर्द्धन कार्यक्रममा मन्त्री अधिकारीले जो मान्छे मन्त्री भएपनि मलको हाहाकार सधैँ भइरहने बताएका हुन् ।
बजारमा मलको माग वार्षिक १३ लाख टनसम्म रहेपनि मागको एक चौथाई मात्रै आयात हुन सकिरहेको स्वीकार गर्दै उनले किसानलाई समयमै मल दिन नसकिने बताए । गत वर्ष कृषि मन्त्रालयलाई मल खरिदका लागि २७ अर्ब ९५ करोड बजेट विनियोजन गरिएकोमा उक्त बजेटले जम्मा साढे ४ लाख टनमात्र मल ल्याउन सकिने उनको भनाइ छ ।
‘मलको हाहाकार छ, यो हुन्छ, जो मन्त्री भएपनि हुन्छ’ उनले भने, ‘गत वर्ष हामीलाई २७ अर्ब ९५ करोड बजेट विनियोजन गरिएको थियो । जम्मा साढे ४ लाख टन भन्दा मल आउँदै आउँदैन ।’
उनले मल दिन नसकिने अवस्था रहेपनि ‘आउँदैछ’ भनेर बोल्नुपर्ने बाध्यता रहेको स्वीकारे । ‘किसानलाई समयमा पुर्याउन सम्भावनै छैन । तर चिन्ता नगर्नुस्, आउँछ भन्नैपर्छ’ उनले भने ।
