नेपाल राष्ट्र बैंकले एनएफआरएस लागु भईनसकेका लघुवित्तको लागि विशेष व्यवस्था गरेको छ । राष्ट्र बैंकले आज सूचना जारी गर्दै एनएफआरएस लागु भईनसकेका लघुवित्तले असारको ब्याज साउनमा आए पनि असार कै आम्दानीमा गणना गर्न पाउने व्यवस्था गरिदिएको हो ।
जस अनुसार हालसम्म NFRS लागु भइनसकेका लघुवित्त वित्तीय संस्थाहरुको हकमा आ.व. २०८०/८१ मा पाकेको ब्याज २०८१ साउन मसान्तभित्र प्राप्त भएमा सो रकमलाई त्यस्ता लघुवित्त वित्तीय संस्थाहरुले आ.व. २०८०/८१ को नाफा नोक्सान हिसाबमा आम्दानी जनाउन पाउनेछन् । यसले लघुवित्तको नाफा बढाउँन सहयोग गर्ने छ ।
राष्ट्र बैंकले आज इजाजतपत्रप्राप्त “क”, “ख”, “ग” र “घ” वर्गका बैंक तथा वित्तीय संस्थाहरु तथा पुर्वाधार विकास बैंकलाई सूचना जारी गर्दै साउनमा प्राप्त हुने ब्याज असार मै गणनाबारे पनि थप प्रष्ट पारेको छ। जस अनुसार इजाजतपत्रप्राप्त संस्थाको लेखानीति बमोजिम आ.व. २०८० / ८१ मा प्रोदभावी आधार (Accural Basis) मा लेखांकन गरिएको ब्याज आम्दानी मध्ये २०८१ साउन मसान्तभित्र प्राप्त भएको ब्याज रकम बाहेक अन्य प्राप्त हुन बाँकी ब्याज आम्दानी बराबरको रकममा प्रचलित नियमानुसारको आयकर तथा कर्मचारी बोनस कट्टा गरी बाँकी रकमलाई सञ्चित मुनाफा (Retained Earning) खर्च गरी नियमनकारी कोषमा जम्मा गर्नुपर्नेछ ।
