सहकारीका बचतकर्ताको रकम हिनामिना गरेको कसुरमा पक्राउ भरी हाल पुर्पक्षका लागि थुनामा रहेका केदारनाथ शर्मामााथि सम्पत्ति शुद्धीकरणको मुद्दा समेत दायर भएको छ । सम्पत्ति शुद्धीकरण अनुसन्धान विभागले पुर्पक्षका लागि थुनामा रहेका केदारनाथ शर्मा विरुद्ध २२ अर्बभन्दा बढीको सम्पत्ति शुद्धीकरणको मुद्दा दायर गरेको हो ।
भक्तपूरको शिवशिखर र विराटनगरको तुलसी सहकारीमाफर्त बचतकर्ताको ६ अर्ब बढी रकम हिनामिना गरेको उजुरी परेपछि उनी फरार थिए । तर, प्रहरीले उनीसहित धेरैलाई पक्राउ गरेर मुद्दा चलाइसकेको छ । नेपाल। प्रहरीको केन्द्रीय अनुसन्धान ब्यूरो (सीआईबी)ले शर्माविरुद्द ६ अर्ब ३ करोड ९ लाख ८७ हजार ३८५ रुपैयाँ बराबरको बिगो माग दाबी गर्दै मुद्दा दायर गरिसकेको छ ।
सीआईबीले अनुसन्धान गर्दा नै सम्पत्ति शुद्धीकरण अनुसन्धान विभागले चासो देखाएको थियो । सीआईबीले अनुसन्धान सकेर मुद्दा दायर गरे लगैत्त विभागले अनुसन्धान थालेको थियो । विभागको अनुसन्धानबाट शर्मा र शर्माकी श्रीमति गीताका नाममा देशका विभिन्न १ सय ठाउँमा जग्गाजमिन भेटिएको छ । निजहरुका नाममा ११६ वटा गाडी समेत भएको विभागको अनुसन्धानबाट देखिएको छ । यसपछिद्ध विभागले शर्मासहित ९ जनाविरुद्ध भक्तपुर जिल्ला अदालतमा ३२ साउनमा मुद्दा दायर गरेको छ । मुद्दामा शर्मा दम्पत्तिसहित प्रतिवादीहरुले चलाएका विभिन्न २२ वटा संस्था तथा कम्पनीको सम्पत्ति जफत गर्न माग गरिएको छ ।
केदारनाथ शर्माकी श्रीमती एवम् शिखर अर्गनाइजेसनकी निर्देशक गीता शर्मा, शिखर अर्गनाइजेसनका व्यवस्थापक पुष्कर मल्ल, शिवशिखर सहकारी भक्तपूरका अध्यक्ष सुशील बानियाँ, व्यवस्थापक लीलानाथ गौतम, सचिव तेजबहादुर तामाङ, मन्दीप खवास, सबिना न्यौपाने र शिव शिखरका ऋण अधिकृत मुकुन्द कपालीलाई प्रतिवादी बनाइएको छ । कपालीलाई सम्पत्ति जफत प्रयोजनका लागि मात्रै प्रतिवादी बनाइएको विभागले बताएको छ ।
प्रतिवादीमध्ये केदार, उनकी श्रीमती गीता, पुष्कर, मन्दीप र सबिना सहकारी ठगीको मुद्दामा पुर्पक्षका लागि थुनामा छन् । बाँकी चार जना फरार छन् ।
सम्पत्ति शुद्धीकरण निवारण ऐन २०६४ को दफा ३ को उपदफा (१) को (क), (ख) र (ग) अन्तर्गतको कसुर गरेको ठहर गर्दै २२ अर्ब ८८ करोड ९५ लाख ७० हजार ४१५ रुपैयाँ बिगो मागदाबी गरिएको सम्पत्ति शुद्धीकरण अनुसन्धान विभागले जनाएको छ ।
यो कुल माग दाबीमध्ये शर्माकी श्रीमती गीताविरुद्ध ५२ करोड ३३ लाख ३२ हजार २१४, शिवशिखर सहकारी भक्तपूरका व्यवस्थापक लिलानाथ गौतमविरुद्ध ५ अर्ब ४८ करोड ४५ लाख ९४ हजार ८०२ रुपैयाँ, शिवशिखर सहकारी भक्तपूरका अध्यक्ष सुशील वानियाँविरुद्ध ५ अर्ब ४८ करोड ४५ लाख ९४ हजार ८०२ रुपैयाँ बिगो मागदाबी गरिएको छ ।
यस्तै, शिवशिखर सहकारी भक्तपूरका सचिव तेजबहादुर तामाङविरुद्ध ७१ करोड ९ लाख १८ हजार ७९५ रुपैयाँ, शिखर अर्गनाइजेसनका व्यवस्थापक पुष्कर मल्लविरुद्ध १० करोड ६३ लाख २२ हजार ९०३ रुपैयाँ बिगो मागदाबी गरिएको छ । सबिना न्यौपानेविरुद्ध १ करोड २४ लाख र मन्दिप खवासविरुद्ध २० लाख बिगो मागदाबी गर्दै मुद्दा दायर भएको छ ।
सय ठाउँमा जग्गा
दुइ वटा सहकारीको अर्बौ रकम अपचलन गरेको अभियोगमा पुर्पक्षका लागि थुनामा पठाइएका शर्मा र उनकी श्रीमतिको नाममा देशैभरी जग्गा जमिन भेटिएको सम्पत्ति शुद्धीकरण अनुसन्धान विभागले जनाएको छ । शर्मा दम्पतिले देशका विभिन्न स्थानका १ सय ठाउँमा जमिन खरिद गरेको पाइएको हो ।
केदारनाथको नाममा झापा, मोरङ, सुनसरी, उदयपुर र म्याग्द का ६९ ठाउँमा जमिन रहेको पाइएको छ । उनकी श्रीमती गीताको काठमाडौंको डिल्लीबजार, दहचोक, कलंकी, बाँके, धादिङ र चितवनका ३१ ठाउँमा जग्गा रहेको भेटिएको छ । यी सबै जग्गा सहकारीका बचतकर्ताको रकमबाट किनिएकाले यी सबै जग्गा जफत हुनुपर्ने मागदाबी गरिएको छ ।
११६ वटा गाडी
सहकारीमा बचत राखेका बचतकर्ताको रकमबाटै ११६ वटा गाडी खरिद गरिएको पनि अनुसन्धानका क्रममा फेला परेको छ । यी सबै गाडी पनि जफत गर्न मागदाबी गरिएको छ ।
शिव शिखर एग्रो धनगढीका नाममा १२ वटा, शिव शिखर एग्रो पोखराको नाममा १२ वटा गाडी रहेको पाइएको छ । यस्तै, भक्तपुर शाखामा ९, कोहलपुर शाखामा ९, तनहुँ शाखाा ७, सुर्खेत शाखामा ७, चितवन शाखामा ७ र बाग्लुङ शाखामा ६ वटा गाडी रहेको पाइएको छ ।
यस्तै, हेटौंडा शाखामा ४, दाङ शाखामा ४, डडेल्धुरा र बोनियाँ शाखामा ३÷३, महेन्द्रनगर शाखामा २, धादिङ शाखामा २, विराटनगर शाखामा एउटा र लमही शाखामा एउटा गाडी रहेको अनुसन्धानले देखाएको छ । गोर्खा टी एण्ड कफीको नाममा २३ वटा, गोर्खा वेभरेज इन्डष्ट्रिजको नाममा ११ वटा र शिखर मिनिरल्सको नाममा २ वटा गाडी पाइएको छ ।
हेर्नुस् कहाँ कहाँ भेटियो जग्गा ?
