सहकारी संस्था वचत रकम दुरुपयोग सम्बन्धमा संसदीय छानविन विशेष समितिले आज सहकारी सम्बद्द विभिन्न संस्थासँग छलफल गरेको छ । साथै प्रतिनिधिसभामा प्रतिनिधित्व गर्ने मान्यताप्राप्त राजनीतिक दलहरूसँग सहकारी समस्या समाधानको सुझाव माग्ने निर्णय गरेको छ ।
समितिले आज राष्ट्रिय सहकारी महासंघ, बचत तथा ऋण केन्द्रीय सहकारी संघ, र राष्ट्रिय सहकारी बैंकका पदाधिकारीसँग छलफल गरेको हो । छलफलमा राष्ट्रिय सहकारी महासंघकी अध्यक्ष ओमदेवी मल्ल र सिईओ चित्राकुमारी थाम्सुहाहाङ, महासंघका पूर्व अध्यक्षहरु मिनराज कँडेल र डीबी बस्नेत , बचत तथा ऋण केन्द्रीय सहकारी संघका अध्यक्ष चन्द्रप्रसाद ढकाल , राष्ट्रिय सहकारी बैंकका अध्यक्ष केबी उप्रेती र राष्ट्रिय सहकारी बैंकका सीइओ बद्री गुरागाई लगायत उपस्थित थिए । उनीहरुले सहकारीसम्बन्धी आआफ्नो क्षेत्रका महत्त्वपूर्ण धारणा राखेको र हाल देखापरेको संकट तथा सहकारी क्षेत्रको समस्या समाधान गर्ने बारेमा महत्वपूर्ण सुझावहरू समेत उपलब्ध गराएको समितिले जनाएको छ।
समितिको आजको बैठकले सहकारी क्षेत्रको वचत अपचलन र ठगी तथा वचत फिर्ताको समस्या सम्बन्धमा प्रतिनिधिसभामा प्रतिनिधित्व गर्ने मान्यताप्राप्त राजनीतिक दलहरूलाई समस्या समाधानका सुझावहरू लिखित रूपमा उपलब्ध गराउन पत्राचार गर्ने निर्णय गरेको छ ।
