स्थानीय तह स्थापना भएको सात वर्ष बितिसक्दा पनि बैंक स्थापना नभएको साइपाल गाउँपालिकामा एभरेष्ट बैंकले शाखा खोल्ने भएको छ । चालु आर्थिक बर्ष २०८०–८१ भित्र नै एभरेष्ट बैंकको शाखा स्थापना गर्ने तयारी गरेको हो ।
गत साता साइपाल गाउँपालिकामा वाणिज्य बैंकको शाखा स्थापनालाई अन्तिम रूप दिने सन्दर्भमा नेपाल राष्ट्र बैंकका गभर्नर महाप्रसाद अधिकारी, गाउँपालिकाका अध्यक्ष मानवीर बोहरा र एभरेष्ट बैंक लिमिटेडका प्रतिनिधिको उपस्थितिमा छलफल भएको थियो। हल्फ्ला पछि यसै आर्थिक वर्षमा शाखा खोल्ने सहमति भएको हो ।
देशभरका ७ सय ५३ स्थानीय तहमध्ये बैंक नभएको एक मात्रै पालिका साइपाल हो । त्यहाँ शाखा खुलाउनको लागि राष्ट्र बैंक र एभरेष्ट बैंक सम्मलित टोलीले अध्ययन गरेको थियो। बैंक स्थापना गर्न सकिने/नसकिने बारे स्थलगत अध्ययन गर्न राष्ट्र बैंकका निर्देशक सत्येन्द्र तिमिल्सिनाको नेतृत्वमा उपनिर्देशक टीकाराम तिमिल्सिना, सहनिर्देशक उत्तम गौनी, एभरेस्ट बैंकका उपमहाप्रबन्धक आशुतोष शर्मा र एभरेष्ट बैंककै बझाङ शाखा प्रमुख कुमार थिङसहितको टोली साइपाल गाउँपालिकाको केन्द्र काँडासम्म पुगेको थियो ।
