वाणिज्य बैंकहरुले गत आर्थिक वर्ष २०८०/०८१ को वित्तीय विवरण सार्वजनिक गरेका छन् । सोमबार प्रकाशित विवरणअनुसार बैंकहरुको नाफा बढेको छ ।
सञ्चालनमा रहेका २० वटा वाणिज्य बैंकले आर्थिक वर्ष २०८०/८१ मा कुल ६४ अर्ब १५ करोड रुपैयाँ खुद नाफा आर्जन गरेका छन् । आर्थिक वर्ष २०७९/०८० मा बैंकहरुको यस्तो नाफा ५६ अर्ब ५७ करोड थियो ।
२० वाणिज्य बैंकहरुमध्ये नाफा बढाउने बैंकहरु १० वटा छन् भने बाँकी १० बैंकको नाफा घटेको छ । सबैभन्दा बढी नाफा प्रभु बैंकले बढाएको छ । अघिल्लो वर्षको तुलनामा प्रभुको नाफा गत आ.व.मा १५ गुणाले बढेको छ ।
रकमका आधारमा सबैभन्दा बढी नाफा गर्नेमा नबिल बैंक पहिलो नम्बरमा छ । नबिलले ७ अर्ब ६ करोड रुपैयाँ खुद मुनाफा गगरेको छ । दोस्रो नम्बरमा रहेको ग्लोबल आइएमई बैंकले ६ अर्ब १ करोड रुपैयाँ नाफा कमाउँदा तेस्रो स्थानमा रहेको नेपाल इन्भेष्टमेन्ट मेगा बैंकले ५ अर्ब १९ करोड रुपैयाँ नाफा कमाएको छ । दास्रो स्थानमा रहेको ग्लोबलको नाफा भने अघिल्लो आर्थिक वर्षको तुलनामा घटेको हो ।
यो अवधिमा प्रभु बैंकले ४ अर्ब ४८ करोड, कुमारी बैंकले २ अर्ब ३० करोड, कृषि विकास बैंकले ३ अर्ब ६५ करोड, एभरेष्ट बैंकले नाफा ३ अर्ब ७० करोड रुपैयाँ नाफा कमाएका छन् । हिमालयन बैंकले २ अर्ब ८३ करोड, नेपाल एसबिआई बैंकले २ अर्ब १ करोड र लक्ष्मी सनराइज बैंकले ३ अर्ब ३ करोड नाफा आर्जन गरेका छन् ।
प्राइम कमर्सिल बैंकले ३ अर्ब ७७ करोड नाफा कमाएको छ ।
यसैगरि, राष्ट्रिय वाणिज्य बैंकको नाफा ३ अर्ब ५९ करोडबाट घटेर ३ अर्ब ३९ करोड कायम हुँदा स्ट्याण्डर्ड चाटर्डको नाफा पनि ३ अर्ब ४६ करोडबाट घटेर ३ अर्ब ३० करोडमा सिमित भएको छ । यस्तै, सिद्धार्थ बैंकको नाफा पनि ३ अर्ब १६ करोडबाट ३ अर्ब १ करोडमा झरेको छ भने सानिमा बैंकको पनि नाफा २ अर्ब ६० करोडबाट २ अर्ब ३८ करोडमा झरेको छ ।
एनएमबी बैंकको नाफा पनि ३ अर्ब २२ करोडबाट २ अर्ब ३३ करोडमा झर्दा नेपाल बैंकको नाफा ३ अर्ब ४३ करोडबाट १ अर्ब ६५ करोडमा खुम्चिएको छ । अघिल्लो आर्थिक वर्षमा ४ अर्ब ४४ करोड नाफा कमाएको एनआईसी एशियाको नाफामा पनि ६८ प्रतिशतले गिरावट आएर १ अर्ब ३८ करोडमा सिमित भएको छ । सिटिजन्स बैंकको नाफा पनि १ अर्ब ८६ करोडबाट १ अर्ब ३४ करोडमा झरेको छ भने माछापुच्छ«े बैंकको नाफा १ अर्ब ६२ करोडबाट १ अर्ब २५ करोडमा आइपुगेको छ ।
