सहकारीका सञ्चालकहरुले बचत अपलचन गरिदिएपछि पीडित बनेका बचतकर्ताले संसदीय छानबिन समितिमा आएर आफ्ना गुनासा पोखेका छन् । सहकारी संस्थाको बचत रकम दुरुपयोग भएको बारे छानबिन गर्न बनेको संसदीय छानबिन विशेष समितिमा आएर पीडितहरुले बैङ्कबाट सहकारीको सम्पत्ति लिलाम हुन नदिन र बचतकर्ता ठग्ने सहकारीका सञ्चालकका तीन पुस्तालाई विदेश जान नदिन आग्रह गरेका छन् ।
संसदीय छानबिन समितिका सभापति सुर्य थापाका अनुसार सहकारी संस्थाको वचत अपचलनमा परी पीडित व्यक्तिहरूसँग प्रतिनिधिमूलक छलफल गरिएको र छलफलमा विभिन्न सहकारीबाट पीडित बनेका ३२ जनाले आफ्नो धारणा राखेको जानकारी दिएका छन् ।
छलफलमा सहभागी कान्तिपूर सहकारीबाट ठगिएका एक जना कचतकर्ताले सहकारीले आफ्नो नाममा किनेको जग्गा र सहकारीका सञ्चालकको नाममा रहेको जग्गा बैङ्कमा धितोका रुपमा रहने र अहिले त्यस्तो जग्गा बैङ्कले लिलामी गर्दा बचतकर्ताले बचत रकम फिर्ता नपाउने जोखिम रहेको भन्दै बैङ्कलाई सहकारीको सम्पत्ति लिलाम गर्न नदिन आग्रह गरेका छन् ।
बागलुङको इमेज बचत तथा ऋण सहकारीबाट पीडित बनेका अर्का व्यक्तिले पनि सहकारी सञ्चालक, तिनका परिवार र सहकारीका उच्च तहका कर्मचारीको नाममा रहेको अधिकांश जग्गा बैङ्कमा धितोको रुपमा रहने र त्यो जमिन बैङ्कले लिलामी गर्न थालेपछि सहकारीका बचतकर्ताको पैसा फिर्ता नआउने जोखिम रहेको गुनासो गरे ।
यस्तै, ओरेन्टल सहकारीबाट पीडित बनेका एक बचतकर्ताले निक्षेपकर्तालाई ठग्ने सहकारीको सम्पत्ति सरकारले कब्जा गरेर त्यसलाई बिक्री गरेर वा लिलाम गरेर बचतकर्ताको बचत फिर्ता गर्ने वातावरण बनाउन माग गरेका छन् ।
सहकारी संस्था वचत रकम दुरुपयोग सम्बन्धमा संसदीय छानविन विशेष समितिको तेह्रौ बैठकमा स्वर्णलक्ष्मी, सूर्य दर्शन, इमेज, सहारा, सुप्रिम, सानोपाइला, सुमेरू, शिवशिखर, नागरिक विकास, तुलसी, क्यापिटल, उपलब्धि, देउराली, गोरखा, कान्तिपुर, पशुपति, ओरेन्टल, आइडियल यमुना र गौतमश्री सहकारीबाट पीडित बनेका ३२ जना प्रतिनिधिहरूले यस्तो माग गरेका हुन् ।
