जग्गाको वर्गीकरण सम्पन्न नगरेका देशभरका स्थानीय तहमा जग्गाको कित्ताकाट रोकिएको छ ।
भूउपयोग नियमावलीअनुसार असार मसान्तसम्म भूमिको वर्गीकरण पूरा नगरेका ४०५ स्थानीय तहमा आज (साउन १ गते)बाट जग्गाको कित्ताकाट रोकिएको हो ।
उक्त नियमावलीमा जग्गाको वर्गीकरण नगरेका स्थानीय तहमा साउन १ गतेदेखि जग्गाको कित्ताकाट स्वतः बन्द हुने व्यवस्था रहेका कारण उक्त प्रावधान आजबाट कार्यान्वयनमा आएको हो ।
देशभरका ७५३ स्थानीय तहमध्ये हालसम्म ३४८ स्थानीय तहले मात्रै भूमिको वर्गीकरण गरेर त्यसको विवरण नापी विभागमा पठाएका छन् ।
कित्ताकाट रोकिएपनि अंशबन्डामा भने असर पर्दैन । जग्गा टुक्रा पारेर बिक्री गर्ने वा व्यवसायिक प्लटिङका लागि हुने कित्ताकाट भने रोकिएको हो ।
भूउपयोग ऐन, २०७६ र नियमावली, २०७९ मा स्थानीय तहले आफ्नो क्षेत्रभित्र पर्ने जग्गालाई कृषि, आवासीय, व्यवसायिक, औद्योगिक, वन, खानी तथा खनिज लगायत १० क्षेत्रमा वर्गीकरण गर्नुपर्ने व्यवस्था छ ।
