प्रधानमन्त्री वालेन्द्र शाहले बुधबार निजी क्षेत्रका प्रतिनिधिसँग करिब २ घण्टा लामो छलफल गरे । उद्योग व्यवसायको अवस्था, लगानीको वातावरण तथा आर्थिक सुधारसम्बन्धी विषयमा प्रधानमन्त्रीले पहिलोपटक निजी क्षेत्रसँग छलफल गरेका हुन् ।
सांसद विदूषी राणासमेत सहभागी बैठकमा प्रधानमन्त्री शाहले नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्ससँग प्रश्नोत्तरसहित छलफल गरेका हुन् । छलफलमा प्रधानमन्त्रीले अर्थतन्त्रको प्रमुख संवाहक नै निजी क्षेत्र हो भन्नेमा सरकार प्रष्ट रहेको भन्दै लगानीमैत्री वातावरण निर्माणका लागि सरकारले नीतिगत र कानूनी रुपमा सहजीकरण गर्ने प्रतिवद्धता जनाएको छलफलमा सहभागी उद्योगी व्यवसायीहरुले बताएका छन् ।
छलफलमा नेपाल उद्योग वाणिज्य महासंघको तर्फबाट सहभागी भएका महासंघका उद्योग समिति सभापति उज्ज्वल श्रेष्ठका अनुसार प्रधानमन्त्री शाहले पूराना नियम र प्रक्रियागत अवरोध हटाउँदै सरकार लगानीमैत्री वातावरण निर्माणमा केन्द्रित रहेको बताएका छन् । उनले अहिले विगतका अभ्यास र प्रक्रियालाई झन्झटरहित बनाउन अहिले प्रधानमन्त्री कार्यालयले नै अध्ययन गरिरहेको र निकट भविष्यमै थप सुधारहरु गर्दै जाने आश्वासन दिएका छन् ।
छलफलमा प्रधानमन्त्री शाहले रोजगारी, उत्पादन र राजस्वमा निजी क्षेत्रको भूमीका महत्वपूर्ण हुन्छ भन्नेमा सरकार जानकार रहेको बताउँदै दीर्घकालिन योजना र लक्ष्यका साथ लगानी गर्न निजी क्षेत्रलाई आह्वानसमेत गरेको श्रेष्ठको भनाइ छ । यसका लागि सरकारको तर्फबाट गर्नुपर्ने कानूनी र नीतिगत सहजीकरणका लागि आवश्यक सल्लाह सुझाव दिन पनि उनले आग्रह गरेका थिए ।
यसैगरी, प्रधानमन्त्रीले सरकार र निजी क्षेत्रबीच निरन्तर संवाद र छलफलको ‘प्लेटफर्म’का रुपमा प्राधिकरण वा अन्य कुनै संयन्त्र गठन गर्ने र त्यसमा निजी क्षेत्रको समेत प्रतिनिधित्व गराउने बताएका छन् । ‘अहिलेसम्म यति प्रभावकारी छलफल कुनैपनि सरकारसँग भएको थिएन’ श्रेष्ठ भन्छन्, ‘निकै राम्रो छलफल भयो । यसले हामीलाई हौसला प्रदान गरेको छ ।’
यस्तै, निजी क्षेत्रका तर्फबाट उद्योगी व्यवसायीहरुमाथि भइरहेको धरपकड र पक्राउका सम्बन्धमा पनि कुरा उठाइएको थियो । यस सम्बन्धमा प्रधानमन्त्री शाहले निजी क्षेत्रका उद्योगी व्यवसायीलाई धरपकड गर्ने र उनीहरुलाई हतोत्साही गर्ने आफूहरुको कुनै मनशाय नरहेको प्रष्ट पारेको श्रेष्ठ बताउँछन् । ‘सरकारको कुनै इन्टेशन होइन भनेर भन्नुभयो । भइरहेको अनुसन्धानलाई टुङ्गोमा पुर्याउने दायित्व मात्रै पूरा गरिएको हो भन्ने कुरा उहाँले राख्नुभयो’ श्रेष्ठले भने ।
एक छोटकरीमा आफ्ना कुरा राख्न भनिएपनि प्रश्नोत्तर र अन्तरक्रियात्मक शैलीमा छलफल अघि बढेकाले लामो कुराकानी भएको छलफलमा सहभागी अर्का एक व्यवसायीले बताएका छन् । उनका अनुसार कुरा सुन्दै, तत्कालै आफ्ना कुरा राख्नै प्रधानमन्त्रीले २ घण्टा समय दिएका थिए ।
छलफलमा नेपाल उद्योग वाणिज्य महासङ्घका अध्यक्ष अञ्जन श्रेष्ठ र महासंघका उद्योग समिति सभापति उज्ज्वलकुमार श्रेष्ठ, नेपाल उद्योग परिसङ्घका निवर्तमान अध्यक्ष राजेशकुमार अग्रवाल र महानिर्देशक घनश्याम ओझा, नेपाल चेम्बर अफ कमर्सका अध्यक्ष कमलेशकुमार अग्रवाल र वरिष्ठ उपाध्यक्ष दीपक मल्होत्राको सहभागिता रहेको थियो ।
