राष्ट्रिय तथ्याङ्क कार्यालयले गरिरहेको आर्थिक गणनामा करिब ३८ हजार प्रतिष्ठान र व्यवसाय बन्द भएको पाइएको हो । तथ्याङ्क कार्यालयले हालसम्म साढे १३ लाख भन्दा बढि प्रतिष्ठान एवं व्यवसायको गणना सम्पन्न भइसकेको भन्दै ३८ हजारको सङ्ख्यामा प्रतिष्ठान र व्यवसाय बन्द रहेको पाइएको जनाएको हो ।
कार्यालयका अनुसार हालसम्म १३ लाख ५१ हजार ३३१ प्रतिष्ठान एवं व्यवसायको आर्थिक गणना सम्पन्न भइसकेको छ । यसरी गणना गर्ने क्रममा विगतमा सञ्चालनमा रहेका तर, हाल बन्द अवस्थामा रहेका प्रतिष्ठान एवं व्यवसायको संख्या करिब ३८ हजार रहेको कार्यालयले जनाएको छ ।
कार्यालयले दोस्रो राष्ट्रिय आर्थिक गणनामा १४ लाख प्रतिष्ठान एवं व्यवसायको आर्थिक गणना गर्ने लक्ष्य लिएको छ । हालसम्म लक्ष्यको ९१.६ प्रतिशत गणना सम्पन्न भइसकेको कार्यालयका प्रवक्तासमेत रहेका उपप्रमुख तथ्यांक अधिकारी ढुण्डीराज लामिछानेले जानकारी दिएका छन् ।
आर्थिक गणनाका लागि देशभर ३ हजार ९०७ गणक र ५२६ सुपरिवेक्षक परिचालन गरिएको छ ।
यसअघि २०७५ सालमा गरिएको आर्थिक गणनामा देशभर ९ लाख २३ हजार ३५६ प्रतिष्ठान एवं व्यवसाय सञ्चालनमा रहेको पाइएको थियो ।
