नेपाल राष्ट्र बैंकका गभर्नर डा. विश्व पौडेलले ऋणीहरुलाई सबैतिरबाट न्याकेर व्यवसायी र उद्यमी बनाउन नसकिने बताएका छन् । संसदको अर्थ समितिमा बोल्दै उनले उद्यमी जन्माउनका लागि उपर्युक्त ‘इकोसिस्टम’ आवश्यक हुने बताएका हुन् ।
‘न्याँकेर, थुनेर, ब्ल्याक लिस्टमा हालेर वा जेल हालेर उद्यमी बनाउन सकिँदैन, उनीहरूका लागि काम गर्ने उपयुक्त इकोसिस्टम आवश्यक पर्छ’ उनले भने, ‘जबर्जस्ती कर्जा प्रवाह गरेर मात्रै पनि उद्यमी वा व्यवसायी जन्माउन सकिँदैन ।’
साथै, उनले सम्भावित बैंक तथा वित्तीय संकटको तत्काल समाधान गर्न राष्ट्र बैंकलाई नै निर्णायक अधिकार दिइनुपर्ने पनि बताएका छन् । वित्तीय प्रणालीको संवेदनशीलता र निक्षेपकर्ताहरूको सुरक्षाका लागि केन्द्रीय बैंकलाई तत्काल निर्णय लिन सक्ने कानुनी अधिकार दिइनुपर्ने उनको भनाइ छ ।
