नेपाल उद्योग वाणिज्य महासंघको वरिष्ठ उपाध्यक्षको चुनाव अगाडि नियमावली संशोधन हुने भएको छ । बिहिबार साँझ बसेको महासंघको कार्यकारिणी समिति बैठकले मनोनित हुने केन्द्रीय सदस्यहरुलाई पनि वरिष्ठ उपाध्यक्षको निर्वाचनमा मतदान अधिकार दिने गरी नियमावली संशोधन गर्न समिति गठन गर्ने निर्णय गरेको हो ।
जिल्ला नगरतर्फका उपाध्यक्ष कृष्ण प्रसाद शर्माको नेतृत्वमा ५ सदस्यीय समिति गठन गरिएको छ । शर्मा नेतृत्वको समितिमा वस्तुगत, एसोसियट र जिल्ला नगरबाट निर्वाचित ४ जना केन्द्रीय सदस्यहरु सदस्य रहेका छन् ।
हालको नियमावलीमा निर्वाचित केन्द्रीय कार्यकारिणी समिति सदस्यले मात्रै वरिष्ठ उपाध्यक्षमा मतदान गर्न पाउने प्रावधान छ । अध्यक्ष अन्जन श्रेष्ठले मनोनित भएर आउने ७ जना केन्द्रीय सदस्यहरुलाई पनि मतदानको अधिकार दिनुपर्ने भन्दै आएका थिए । तर, सफल भएका थिएनन् । अब भने उनले नियमावलीमै संशोधन गरेर मनोनित सदस्यहरुलाई पनि वरिष्ठ उपाध्यक्ष र कोषाध्यक्ष चयन प्रक्रियामा सहभागी गराउने भएका हुन् ।
नियमावली संशोधनका लागि गठित उपाध्यक्ष शर्मा नेतृत्वको समितिलाई ७ दिनको समय दिइएको छ । उक्त समितिले ७ दिनभित्र आफ्नो सिफारिस दिनेछ । त्यसपछि उक्त समितिको सिफारिस बमोजिम केन्द्रीय कार्यकारिणी समितिले नियमावलीमा संशोधन गर्नेछ ।
भियतनाममा समेत पुगेको थियो विवाद
चन्द्र ढकालको कार्यकालमा भियतनाम भ्रमणका क्रममा त्यहाँ नै महासंघको एउटा बैठक बसेको थियो । उक्त बैठकमा पनि मनोनित केन्द्रीय सदस्यहरुलाई वरिष्ठ उपाध्यक्ष चयनको प्रक्रियामा भाग गराउने कि नगराउने भन्ने विषयमा ढकाल र अन्जन श्रेष्ठबीच विवाद भएको थियो ।
संशोधित विधान अनुसार अध्यक्षले ७ जना केन्द्रीय सदस्य मनोनित गर्न पाउने प्रावधान छ । तर, यी ७ जना वरिष्ठ उपाध्यक्षको निर्वाचन पछि मनोनित गर्ने कि वरिष्ठ उपाध्यक्षको निर्वाचन अगाडी नै मनोनित गर्ने भन्नेमा त्यतिबेला ढकाल र श्रेष्ठबीच विवाद भएको स्रोतले बताएको छ ।
तर अब भने केन्द्रीय कार्यकारिणी समितिमा अध्यक्ष अन्जन श्रेष्ठ समर्थित केन्द्रीय सदस्यहरुको बहुमत रहेकाले उनले चाहे अनुसार नै काम गर्न सक्ने बाटो खुलेको छ ।
वरिष्ठ उपाध्यक्षको निर्वाचन कहिले ?
नियमावलीमा संशोधन गरे पछि मात्रै वरिष्ठ उपाध्यक्ष र कोषाध्यक्षको निर्वाचन हुने भएको छ । ‘नियमावली संशोधनका लागि बनाइएको समितिले सिफारिस गरेका आधारमा अर्को हप्ता बैठक बसेर नियमावली संशोधन गरिन्छ’ स्रोत भन्छ, ‘नियमावली संशोधन भएपछि अध्यक्ष ज्यूले केन्द्रीय कार्यकारिणी समितिमा ७ जनालाई मनोनित गर्नुहुन्छ । त्यसपछि मात्रै वरिष्ठ उपाध्यक्ष र कोषाध्यक्षको निर्वाचन हुन्छ ।’
स्रोतका अनुसार वरिष्ठ उपाध्यक्ष र कोषाध्यक्षको निर्वाचन एकैपटक गर्ने तयारी गरिएको छ । यसका लागि निर्वाचन समिति पनि छुट्टै गठन गर्ने तयारीमा अध्यक्ष श्रेष्ठ रहेका छन् ।
