युवा व्यवसायी सागर ढकालले नेपाल उद्योग वाणिज्य महासंघको निर्वाचनमा केन्द्रीय सदस्य पदमा निर्वाचित भएका छन् । नेपाल स्टक ब्रोकर एसोसिएसनका अध्यक्ष रहेका ढकालले वस्तुगत तर्फबाट महांसघको केन्द्रीय सदस्य निर्वाचित भएका हुन् ।
ढकाल पूँजीबजारसहित अन्य विभिन्न व्यवसायमा आवद्ध छन् । निर्वाचित भएसंगै उनले पूँजीबजारमा आवद्ध रहेका ७२ लाख भन्दा लगानीकर्ताहरूको आवाजलाई महासंघमार्फत नीति निर्माताहरुको तहमा पुर्याउने प्रतिवद्धता जनाएका छन् । अर्थतन्त्रको मुख्य इन्जिन निजी क्षेत्र नै भएको र त्यसको मेरुदण्डका रुपमा पूँजीबजार रहेको भन्दै ढकालले यो विषयलाई महासंघको फोरममार्फत सरकार, नीति निर्माता र सरोकारवाला समक्ष आफूले सशक्त रुपमा उठाउने बताएका छन् ।
उनले धितोपत्र ऐन २०६३ र यस अन्तर्गतका नियमावलीहरूलाई बदलिँदो बजारको आवश्यकता अनुसार समयसापेक्ष परिमार्जन गर्न प्रभावकारी पहल गर्ने बताएका छन् । नयाँ वित्तीय उपकरणहरूको विस्तार गर्दै मार्जिन ट्रेडिङ, इन्ट्रा डे ट्रेडिङ, सर्ट सेलिङ र इक्विटी डेरिभेटिभ्स जस्ता आधुनिक वित्तीय उपकरणहरू सञ्चालनमा ल्याउन धितोपत्र बोर्डसँग समन्वय गर्ने तथा कमोडिटिज, फरेन करेन्सी र बुलियन एक्सचेन्ज स्थापनाका लागि पहल गर्ने उनको लक्ष्य छ ।
साना तथा मझौला उद्यमी व्यवसायहरूलाई पूँजी जुटाउन सहज बनाउने एसएमई प्लेटफर्म र ओटी मार्केटलाई पूर्ण रूपमा सञ्चालनमा ल्याउन पनि आफूले महासंघमार्फत पहल गर्ने उनको योजना रहेको छ ।
अन्तर्राष्ट्रिय लगानीको ढोका खुला गर्न गैरआवासीय नेपाली र विदेशी लगानीकर्ताहरूलाई नेपाली पूँजी बजारमा भित्र्याउन स्पष्ट र सहज नीति निर्माणमा सरकारलाई सहयोग गर्ने समेत उनले योजना बनाएका छन् ।
युवा उमेरै धेरै व्यवसायिक र संस्थागत अनुभव हासिल गरिसकेका ढकाल पूँजीबजारमा मात्रै भने सिमित छैनन् । उनले जलविद्युत्, होटल, पर्यटन, कृषि लगायतका विभिन्न क्षेत्रमा आफ्नो लगानी विस्तार गरेका छन् ।
