कुमारी बैंकले मास्टरकार्डद्वारा सञ्चालित आफ्नो पहिलो डेबिट कार्ड सार्वजनिक गरेको छ । जसले बैंकको डिजिटल तथा कार्डमा आधारित सेवाहरू सुदृढ गर्ने प्रयासमा एक महत्वपूर्ण उपलब्धि हासिल गर्ने बैंकले जनाएको छ ।
यो सुरुवातले सुरक्षित, सहज र विश्वव्यापी रूपमा स्वीकार्य भुक्तानी समाधान प्रदान गर्ने बैंकको रणनीतिक लक्ष्यलाई झल्काने समेत बैंकले जनाएको छ ।
उक्त कार्डको सुरुवात गर्न आयोजित कार्यक्रममा बैंकका प्रमुख कार्यकारी अधिकृत रामचन्द्र खनालले नवप्रवर्तन र ग्राहक केन्द्रित सेवा प्रवाहप्रति बैंकको प्रतिवद्धता पुनः पुष्टि गर्दै अन्तर्राष्ट्रिय रूपमा स्वीकार्य भुक्तानी प्लेटफर्ममा सबैको पहुँचले सेवा गुणस्तर र ग्राहकको विश्वास दुवै सुदृढ बनाउने बताए ।
थप विवरण दिँदै प्रमुख डिजिटल बैंकिङ् अधिकृत अनिश ताम्राकारले नयाँ डेबिट कार्ड नेपाल, भारत र भूटानका मास्टरकार्ड स्वीकार गर्ने सबै एटीएम र प्वाइन्ट अफ सेल टर्मिनलहरूमा प्रयोग गर्न सकिने जानकारी दिए ।
ताम्राकारले निकट भविष्यमा कुमारी बैंकले आफ्नै मास्टरकार्ड क्रेडिट कार्ड पनि सुरु गर्ने योजना बनाएको जानकारी दिँदै यसले बैंकको डिजिटल भुक्तानी प्रणालीलाई अझ सुदृढ बनाउने उल्लेख गरे । उनले गत वर्षदेखि नै बैंकले देशभर आफ्नो एटीएम सञ्जालमार्फत मास्टरकार्ड कारोबार स्वीकार गर्दै आएको र अब आफ्नै डेबिट कार्ड जारी गरेसँगै बैंकको पूर्ण कार्ड सेवा क्षमता अझ सशक्त भएको बताए ।
बैंकले हाल २९७ शाखा, ३१५ एटीएम, ४५ एक्सटेन्सन काउन्टर तथा ४८ शाखारहित बैंकिङ इकाइहरूबाट सेवा दिँदै आएको छ ।
