गुडिरहेको गाडीमा अचानक आगो लाग्न सक्ने जोखिमलाई ध्यान दिँदै तैयब अटो वर्कशपले तत्काल आगो निभाउने उपकरण नेपाल भित्र्याएको छ । कम्पनीले भारतीय बजारमा लोकप्रीय बनिरहेको ‘अटो फायर एक्सटिनगुजर (एएफई) नेपाल ल्याएको हो ।
भारतीय उत्पादक ब्राण्डस्ड्याडीको उत्पादनलाई ईभी र आईस इन्जिनवाला गाडीमा सजिलै फिट गर्न सकिन्छ । एउटा गाडीमा जम्मा ४ वटा एएफई जडान गर्नुपर्छ । यसरी जडान गरिएका एक्सटिनगुजरहरु गाडीमा आगो लागेको खण्डमा तत्कालै आफैँ खुल्छन् र आगो निभाउन मद्दत गर्छन् ।
‘गाडीमा आगो लाग्न थालेको ३ सेकेण्ड भित्रमा एक्सटिनगुजर अटोमेकिट रुपमा आफैँ खुल्छन् र आगो निभ्छ’ तैयब अटो वर्कशपका सञ्चालकले भने, ‘१० सकेन्डभित्रै आगो निभ्ने यो प्रोडक्ट इन्डियामा अहिले धेरै चलिरहेको छ । नेपालमा पनि गाडीमा हुन सक्ने आगलागीको घटनालाई मध्यनजर गरेर हामीले भित्र्याएका छौँ ।’
अहिले नेपाली बजारमा यसको मूल्य सरदर एक पिसको ५ हजार रुपैयाँ पर्न सक्ने देखिएको छ । नेपाली बजारमा आयात, भन्सार शुल्क र अन्य महशुलहरु जोडेर कम्पनीले बिक्री मूल्य तय गर्नेछ ।
एउटा गाडीमा अगाडि र पछाडी गरी ४ वटा एक्सटिनगुजर जडान गर्दा त्यसले सम्भावित जोखिमबाट बचाउने कम्पनीको भनाइ छ । ‘लाखौँको गाडीमा केही हजारमा पाउने यो प्रोडक्ट जडान गर्दा यात्राका क्रममा आगलागीको जोखिम रहँदैन’ तैयब अटोका सञ्चालक थप्छन्, ‘ईभी गाडीमा अहिले हामीले प्राथमिकता दिँदैछौँ । तर, आइस गाडीहरुसहित रेसिडेन्स र कमर्सियल भवनहरुमा पनि यो प्रोडक्ट जडान गर्न सकिन्छ ।’
अटो फायर एक्सटिनगुजरको उत्पादक ब्राण्डस्ड्याडी नामक कम्पनी चर्चित टेलिभिजन शो ‘सार्क ट्याङ्क इन्डिया’मा समेत सहभागी थियो ।
