सिद्धार्थ बैंक नेपाल प्रिमियर लिग (एनपीएल) क्रिकेटको आज फाइनल खेल हुँदैछ । दोस्रो संस्करणको एनपीएलको फाइनलमा आज सुदूरपश्चिम रोयल्स र लुम्बिनी लायन्स भिड्दैछन् ।
त्रिवि क्रिकेट रंगशालामा ३ः३० बजेदेखि सुरु हुने खेलमा दूबै टोली पहिलोपटक उपाधि जित्ने लक्ष्यमा छन् । पहिलो सिजनको उपाधि विजेता जनकपूर बोल्ट्स यसपाली लिग चरणबाटै बाहिरिएसँगै यसपाली जसले जितेपजि एनपीएलले नयाँ च्याम्पियन पाउनेछ ।
सुदूरपश्चिम लगातार दोस्रोपटक फाइनल पुगेको हो भने लुम्बिनी लायन्स यसपाली पहिलोपटक प्लेअफ पुगेर फाइनल प्रवेश गरेको हो ।
पहिलो संस्करणमा फाइनल पुगेपनि सुदूरपश्चिम जनकपुरसँग पराजित हुँदै उपविजेता बनेको थियो । यसपाली पनि लिग चरणमा शानदार प्रदर्शन गर्दै शीर्ष स्थानमा रहेको सुदूरपश्चिम पहिलो क्वालिफायर जितेर सिँधै फाइनलमा पुगेको हो ।
लुम्बिनीले यस सिजन उत्केष्ट कमब्याक गरेर फाइनलसम्मको यात्रा तय गरेको हो । लुम्बिनीका कप्तान रोहित पौडेल नेपाली राष्ट्रिय टोलीका कप्तानसमेत हुन् । सुदूरपश्चिमका कप्तान दीपेन्द्रसिंह ऐरी राष्ट्रिय टिमका उपकप्तान हुन् ।
