ग्वार्को फ्लाई ओभर दशैँअघि नै सम्पन्न गर्न स्थानीयवासीले माग गरेका छन् । आइतबार बागमती प्रदेश सदस्य रामकृष्ण चित्रकारसहित स्थानीयहरुले फ्लाई ओभर निरीक्षण गरी दशैँ अघि नै सम्पन्न गर्न माग गरेका हुन् ।
उनीहरुले निर्माणाधिन फ्लाई ओभर निर्माणको काममा ढिलासुस्ती हुँदा स्थानीयहरुलाई समस्या भएको बताउँदै फ्लाई ओभर छिटो निर्माण सम्पन्न गर्न माग गरेका हुन् । स्थानीयहरुले एक पटकमा एक डेढ घण्टासम्म जाम हुँदा धुवाँ धुलोका कारण छाती, फोक्सोसम्बन्धी रोग लाग्ने समस्या बढेको गुनासो गरेका छन् ।
२०७८ फागुन १२ गतेबाट सुरु भएको ४ लेनको फ्लाई ओभर निर्माणको जिम्मेवारी श्री आशिष–समानान्तर रेलिगेर जेभीले पाएको थियो । १७ करोड ६ लाख ८८ हजारको लागतमा बन्न लागेको फ्लाई ओभरको लम्बाई ४९० मिटरको रहनेछ ।
