विश्वप्रसिद्ध पेय पदार्थ कम्पनी कोका-कोलाले भारतमा आफ्नो बोटलिङ इकाई हिन्दुस्तान कोका-कोला बेभरेजेस (एचसीसीबी) को सार्वजनिक शेयर निष्काशन गर्ने तयारी गरेको छ। भारतीय संचारमाध्यामहरुका अनुसार यो आईपीओबाट कम्पनीले १ अर्ब अमेरिकी डलर (लगभग १३४ अर्ब नेपाली रुपैयाँ) उठाउने लक्ष्य राखेको छ।
ब्लुमबर्ग न्यूजले स्रोतहरूलाई उद्धृत गर्दै यो समाचार प्रकाशन गरेको हो, जसमा कम्पनीले हालै बैंकर्सहरूसँग छलफल गरेको उल्लेख छ। यो योजना अझै प्रारम्भिक चरणमा छ र कम्पनीले आईपीओका लागि बैंकर्स नियुक्त गरेको छैन। यदि यो योजना अगाडि बढ्यो भने, आईपीओ अर्को वर्ष (२०२६) मा हुन सक्छ।
हिन्दुस्तान कोका-कोला बेभरेजेस भारतमा कोका-कोलाको मुख्य बोटलिङ पार्टनर हो, जसले कोका-कोला, स्प्राइट, थम्स अप जस्ता ब्रान्डहरू उत्पादन र वितरण गर्दछ। आईपीओको आकार १ बिलियन डलर हुने अनुमान गरिएको छ, जसले कम्पनीको कुल मूल्यांकनलाई लगभग १० बिलियन डलरसम्म पुर्याउन सक्छ।
यो आईपीओ भारतको पेय उद्योगमा ठूलो क्षण हुन सक्ने बताईएको छ, किनकि भारत विश्वको सबैभन्दा ठूलो जनसंख्या भएको बजार हो र कोका-कोलाको लागि महत्वपूर्ण वृद्धि क्षेत्र मानिन्छ। कम्पनीका प्रतिनिधिहरूले यो विषयमा आधिकारिक टिप्पणी गरेका छैनन्, तर यो कदमले कोका-कोलालाई भारतीय बजारमा थप विस्तार गर्न र लगानीकर्ताहरूलाई अवसर प्रदान गर्न सक्छ।
यसअघि, कोका-कोलाले भारतमा विभिन्न लगानीहरू बढाउँदै आएको छ, जसमा नयाँ प्लान्टहरू र उत्पादन विस्तार समावेश छन्। यो आईपीओ सफल भएमा, यो भारतको आईपीओ बजारमा अर्को ठूलो डिल हुनेछ, जसले अन्य बहुराष्ट्रिय कम्पनीहरूलाई पनि प्रेरित गर्न सक्ने बताईएको छ।
