फिफा विश्वकप २०२६ को छनोट चरणमा मंगलबार (१४ अक्टोबर) रोमाञ्चक खेलहरू सम्पन्न भएसँगै ६ राष्ट्रिय टोलीहरूले अमेरिका, क्यानडा र मेक्सिकोमा आयोजना हुने प्रतियोगिताको लागि सीधा छनोट सुनिश्चित गरेका छन्। यससँगै विश्वकपमा सहभागी हुने टोलीहरूको संख्या बढेर २८ पुगेको छ। यी टोलीहरूले आफ्ना प्रतिद्वन्द्वीहरूलाई पराजित गर्दै इतिहास रचेका छन्।
छनोटमा सफलता हासिल गर्ने टोलीहरूमा दक्षिण अफ्रिका, कतार, इङ्ल्यान्ड, साउदी अरब, आइभोरी कोस्ट र सेनेगल रहेका छन्। मंगलबारका खेलहरूमा यी टोलीहरूले निम्नानुसार विजयी नतिजा निकालेका थिए।
दक्षिण अफ्रिकाले घरेलु मैदानमा रवान्डालाई ३–० ले हरायो। कतारले उत्तर कोरियालाई २–१ ले पराजित गर्दै समूहको अन्तिम खेलमा छनोट भएको हो। यो टोलीको २०२२ पछि लगातार दोस्रो विश्वकप सहभागिता हो।
इङ्ल्यान्डले लाट्भियालाई हराएर युरोपेली छनोट समूह केको शीर्ष स्थान सुनिश्चित गर्यो। ह्यारी केनको दोहोरो गोलले इङ्ल्यान्डलाई पहिलो युरोपेली टोली बनायो जसले २०२६ विश्वकपको टिकट सुनिश्चित गरेको हो।
साउदी अरबले इराकसँगको खेलमा विजयी हुँदै एसियाली छनोट चरणको अन्तिम खेलमा स्थान पक्का गर्यो। यसले साउदी अरबलाई लगातार विश्वकप सहभागिताको निरन्तरता दियो।
आइभोरी कोस्टले केन्यालाई ३–० ले धराशायी पार्यो। अमाद डायलोको गोलसहितको प्रदर्शनले एलिफेन्ड्सलाई २०१४ पछि दोस्रो पटक विश्वकपमा फर्किने मौका दियो। सेनेगलले माउरिटानीयालाई ४–० ले हरायो। साडियो मानेको दोहोरो गोलले टेराङ्गा लायन्सलाई तेस्रो लगातार विश्वकप सहभागिता सुनिश्चित गर्यो।
विश्वकप २०२६ जुन ११ देखि जुलाई १९ सम्म अमेरिका, मेक्सिको र क्यानडामा आयोजना हुनेछ। यो ४८ टिम सहभागी हुने विस्तारित संस्करण हुनेछ। विश्वकपको लागि हालसम्म २८ देश छनौट भएका छन् ।
हालसम्म छनौट भएका देशहरु :
- क्यानडा
- मेक्सिको
- संयुक्त राज्य अमेरिका
- जापान
- न्युजिल्यान्ड
- इरान
- अर्जेन्टिना
- उज्बेकिस्तान
- दक्षिण कोरिया
- जर्डन
- अष्ट्रेलिया
- ब्राजिल
- इक्वाडोर
- उरुग्वे
- कोलम्बिया
- प्याराग्वे
- मोरक्को
- ट्युनिसिया
- इजिप्ट
- अल्जेरिया
- घाना
- केप भार्डे
- साउथ अफ्रीका
- कतार
- इंग्ल्यान्ड
- साउदी अरेबिया
- आइभोरी कोस्ट
- सेनेगल
